Minister Ursell Arends a tuma nota di e investigacion haci den parlamento pa loke t’e caso di Aruba Huis y e ex-minister plenipotenciario, Guillfred Besaril. Segun e mandatario a splica cu el a tuma nota di e punto aki cu a bin den conseho di minister pa atende como tambe den parlamento.
Esaki mester conta pa tur, p’e mes, pa su coleganan minister y pa cualkier ambtenaar. “Si bo mal uza fondo publico, e lo bin cu consecuencia pa bo,” el a splica.
Loke ta tristo y ta sali padilanti ta cu ora tin un funcion, vooral si ta un minister of ta un minister plenipotenciario, e mester ta ehempel pa comunidad. Pa Arends e ta un lastima cu e tipo di acto aki a tuma luga. E no kier husga ningun hende, pero mester bisa cu aworaki cu e dossier a keda entrega na Ministerio Publico, cu ta cuminsa cu e caso cu lo bay den man di husticia, tin cu cuminsa cana e parti legal.
Arends ta duna espacio pa esaki formalisa y e proceso cana su proceso debido. Mescos cu el a subraya riba ful e proceso di parlamentario Benny Sevinger. El a bisa tambe cu e no t’esun cu lo husg’e. E ta “innocent until proven guilty” y unabes condena, e ora por bisa cu a haci algo cu ta contra ley.
Aworaki nan ta sospechoso y unabes cu esaki ta formalisa y e proceso penal ta completa y ta husga, e ora ey e minister por bisa cu e castigo cu e hendenan aki haya, nan merece.
Durante noticiero Enfoke ta bisa “Speak your words nice and sweet, just incase you have to swallow them”. Ora cu sali y declara algo y den e caso aki, ora cu e mandatario a retira, el a duna un motibo y a sali na cla cu ta pa un otro motibo.
Esey pa Arends, e dicho aki ta aplicabel pa cada un. E ta keda recorda esaki y ta sigur cu pueblo tambe ta mira y ta mantene nan responsabel pa nan acto.
Segun minister Arends, e pasonan cu a tuma den e caso aki ta uno corecto. Aworaki loke a haci, ta lo corecto. A tuma e pasonan y e dossier a keda entrega na Ministerio Publico. Si mester yega na un caso penal, lo mester atende cu husticia.
Cu bentamento di e gobierno abao, no ta soluciona nada. No a stop pa den futuro esaki no sosode. Ta sigui traha pa introduci regla y procedura como tambe e leynan, pa den futuro tipo di cos asina no mester sosode. Esey ta e responsabilidad como mandatario.
