Minister di Turismo y Salubridad Publico, Dangui Oduber a anuncia awe cu otro aña, entrante dia 8 februari 2023, Spirit Airlines lo añadi un vuelo mas semanal pa y for di Fort Lauderdale. “Cu esaki lo tin 2 vuelo pa siman, un riba diaranson y e otro diasabra”, asina e mandatario a anuncia cu un sonrisa di satisfaccion riba su cara.
JetBlue ta cumprando Spirit Airlines
Tabata na fin di juli cu JetBlue Airways Corporation y Spirit Airlines Inc. a anuncia cu su conseho di administracion a aproba un acuerdo di fusion definitivo segun cual JetBlue lo adkiri Spirit pa 3.8 biyon dollar y un balor empresarial ahusta di 7.600 miyon dollar.
E aerolinea lo ofrece su 77 miyon di cliente combina mas opcion y eleccion. JetBlue tin planea pa hiba e ‘JetBlue Experience’ na tur avion, ofreciendo e combinacion unico di JetBlue di tarifa abao y bon servicio na mas cliente. E adkisicion aki lo aumenta e relevancia di JetBlue den cierto ciudadnan clave, como tambe den centro di e cuater aerolineanan grandi. E aerolinea combina lo dispone di un flota di 458 avion riba un base pro forma y un cartera di pedido di mas di 300 avion Airbus cu motor neo, di consumo di combustibel y menos emision di carbon, cu lo proporciona mas flexibilidad y eficiencia n’e tempo cu lo mitiga e riesgo di un disponibilidad limita di avion.
E mihonan di Merca
E dies miho aerolineanan di Merca actualmente (den secuencia):
1. Delta Airlines
2. Southwest Airlines
3. United Airlines
4. Alaska Airlines
5. American Airlines
6. Jetblue Airways
7. Hawaiian Airlines
8. Spirit Airlines
9. Frontier
10. Allegiant Airlines
Spirit Airlines
Spirit Airlines ta funda na aña 1983, e ta e aerolinea mas grandi ora ta papia di ‘low cost.’ Nan ta bula pa diferente destinacion den Merca, Caribe y Latino America. Su base principal ta na Miami, Florida, pero tin diferente hub manera Orlando, Fort Lauderdale, Detroit, Dallas y Las Vegas. Spirit ta bula un biaha pa siman pa Aruba, cu vuelo directo for di Fort Lauderdale. Su ‘ratings’ no ta mucho di gaba, e ta score hopi abou riba confiabilidad, na tempo y servicio. Actualmente e compania ta conta cu un total di 175 avion di e compania Airbus, di cual ya a pidi 135 extra caba. E compania ta conta cu casi nuebe mil trahado actualmente.
📸: Vince Camargo Photography Aruba
