Entrante prome di januari 2023, e cambionan di ley pa preveni y combati labamento di placa y financiamento di terorismo (LWTF) ta drenta na vigor. Un di e cambionan ta encera implementacion di un UBO-Register, un registro di e doñonan di e compania. Door di mantene un registro di UBO paisnan mundialmente kier reforsa e esfuerso pa preveni cu entrada di e actividadnan ilegal y/o criminal integra den e economia y via otro canal resulta den financiamento di terorismo.
Un UBO ta e “Ultimate Beneficial Owner”, pues e persona cu na final di cuenta ta e beneficiario/propietario of esun cu por tuma decision pa cu un organisacion, compania, fundacion of asociacion. Por pensa entre otro riba personanan cu tin mas cu 25% di e accionnan di e compania of personanan cu tin mas cu 25% di bienes di un empresa. Mescos cu e Registro Comercial y esun di Fundacion, a asigna e tarea pa instala y administra e UBO-Register na Camara di Comercio y Industria (KvK) y a incorpora den e ley di Registro (Handelsregisterverordening).
Cu e cambio di leynan aki, entrante prome di januari 2023, entidadnan huridico, fundacionnan y asociacionnan tin e obligacion di registra nan UBO(nan) den e UBO-Register. E obligacion di registracion aki ta cay riba e director y doño di e compania. Den caso cu e director of doño di e compania ta un entidad huridico, tur e dirigentenan di e entidad aki mester yena e formulario digital corespondiente pa registra UBO. Tambe ora tin cambio den e doño(nan) mester registra e cambio na KvK.
E entidadnan cu no tin e obligacion di registra nan UBO den e UBO-Register, pues exonera di e registracion, ta e eenmanszaken, asociacionnan cu no tin hurisdiccion completo y asociacionnan di propietario. Lo registra e UBO(nan) di e companianan nobo via notario. Companianan existente prome cu prome di januari 2023 mester percura pa inscribi nan UBO(nan) den e UBO-Register na KvK. Por haci esaki entrante 4 di januari 2023 door di yena e formulario digital via e website di KvK den e MyChamber account di e compania. Si no ta registra e UBO e director of doño por haya un boet.
