Dialuna mainta den rueda di prensa Minister Dangui Oduber a elabora riba e situacion di Lotto. El a informa cu e nomber di e fundacion nobo di lotto ta conoci. E intencion ta pa aki tres luna introduci “Loteria Nacional pa Salud Y Recreacion” na comunidad y hacie operacional, segun e mandatario. Minister Oduber a trece dilanti cu e loteria nobo lo ta di pueblo y aki si e placa lo bay pa deporte.
Den e ultimo 10 añanan Fundacion Lotto Pa Deporte (FLPD) no a mantene niun compleho deportivo, tur ta den mal estado. Ainda por corda con CONCACAF a keur af nos stadionnan pa tene weganan internacional, tur esaki ta motibonan pa lanta un lotto nobo, segun e mandatario. Gobierno di Mike Eman a cera un acuerdo cu Canadian Bank Note cu a haci nan doño di FLPD y mara gobierno na man cu pia sin por haci nada cu e contracto cu no ta den bentaha pa deporte. Canadian Bank Note ta bende 54 miyon florin di lotto pa aña di cual Canada ta haya 11 miyon florin na GANASHi PURO y na final solamente 4 miyon florin ta bay pa deporte. E minister a sigui bisa cu deporte no ta hayando su fair share for di Canadian Bank Note, y p’esey a opta pa bin cu e lotto nobo.
Minister Dangui Oduber a menciona cu e Fundacion di e lotto nobo lo tin e proposito principal pa genera entrada cual lo bay pa drecha e infrastructura, mantencion di facilidadnan, iluminacion di veldnan y artificial turf pa e complehonan. E Lotto nobo tambe lo yuda Gobierno cu fondonan pa inverti den campañanan di conscientisacion riba salud, pa e comunidad di Aruba hiba un bida mas saludabel. Prevencion di salud ta sumamente importante y ta p’esey lo genera fondo pa inverti den prevencion.
E 4 miyon florin cu Stichting Sportsubsidie Aruba ta ricibi anualmente for di FLPD ta wordo reparti na tur e federacionnan deportivo y esey lo keda igual.
Minister Oduber a trece dilanti cu na e momentonan aki e statuut di e fundacion nobo ta cla y mester finalisa e acto oficial na notario. Na mes momento e cambio di ley lo wordo entrega pa fraccion di MEP na Parlamento p’asina haci e cambionan necesario. Minister a expresa cu e ta optimista cu dentro di 3 luna e lotto nobo ta un realidad. Comunidad lo tin e escogencia entre sostene un Lotto di Canada caminda deporte no ta haya su fair share y tur placa ta bay Canada of sostene un lotto di pueblo di Aruba” Oduber a finalisa bisando.
