Shelange Kemp ta mama di e tres yiunan di Gerson Martina, kende a huy diadomingo ultimo for di KIA. El a huy na un manera cu ningun hende no por a spera y keto bay ta pafo.
Tur hende tin wowo riba Gerson Martina como un criminal peligroso. Pero famianan tambe ta preocupa. Entre otro su ruman pero tambe su pareha.
Shelange Kemp ta splica kico ta e situacion cu Gerson Martina, kende awor aki ningun hende no sa unda e ta.
Pa basta tempo caba famianan tin informacionnan acumula di e dolornan cu Gerson Martina a pasa den prizon. Shelange Kemp a splica cu Martina a comete un acto delictivo. E ta para den sentido responsabel pa e acto cu el a comete. E ta haya un castigo, y e ta sinta su castigo. Durante bishita, Martina ta expresa su mes cu e famianan di cosnan cu nan mes no sa, di e problemanan cu ta sosode paden. Hende ta pinta Martina como un hende agresivo y peligroso. Pero no ta mira e otro banda di medaya, e motibo pakico e ta expresa su mes asina, pa ki motibo.
Tin motibonan su tras cu e ta yega asina leu. Martina a haya un castigo y a yega su tempo cu supuestamente mester a Sali, despues cu el a cay cera na 2015 y ta sintando un castigo di 4 aña. E mester a sali dia 6 di juni 2018. Kemp a menciona cu el a haya VI pa seis luna, pero a bise cu si e comporta, e tin chens di bay cas. A dun’e opcion pa traha of haci un curso. Martina a opta pa traha. Den su manera di wak, e ta bisa di su banda, e ta keda toch positivo, cu e ta opta pa bay traha, pa e comporta su mes.
A pasa otro seis luna y e no a haya su VI. Esaki tabatin di haber cu caso di trahado social, caminda cu un detenido ta lanta un caso contra di Martina. El a cuestiona cu ta atende cosnan cu Martina ta haci, pero loke cu nan haci contra Martina, no ta haci ningun investigacion ni ta tuma medida. Por ehempel nan a hinca Martina y e persona cu a hinca Martina, a sali liber. Nan no a acerca Martina y puntra kico ta e motibo. Nan no ta busca tur dos banda di medaya segun Kemp.
Dos luna despues cu e agresor aki a hinca Martina, el a recobra su libertad. E hincanan ey, cu si Martina tabata un hende hopi debil, awe e no lo t’ey mas na e mundo aki. Famianan ta bisa cu si e ta hende cu nan no gusta of hendenan no ta klik cun’e, esey no ta bon. E ta un hende, e tin su foutnan mescos cu tur hende. Pero tin cu wak tur dos banda di medaya. Nan por wak e banda con e ta haci su malonan, pero ora cu nan haci malo cun’e, nada no ta bin afo, nan no ta puntra Martina kico a pasa. Nan ta puntra, pero no ta haci caso. Of ora cu e bay cerca e trahado social, splica kico a pasa, nan no ta worry of nan ta bis’e cu nan ta bay haci algo, pero e ta ripara cu nan no ta haci nada. Pero ora e haci algo, tur cos ta bin dilanti y ta busca pa saca afo tur cos.
Kemp, como mama di su yiunan, ora cu e bay bishit’e, e ta expresa su mes hopi cun’e, pasobra e kier pa e famianan cu ta bishit’e, sa tur loke ta pasa cun’e paden.
Kemp ta bay cu e muchanan bishit’e y Martina ta sinti su mes trankil. Apart di esey, Martina ta expresa kico tur ta pasa paden. No ta pasobra e ta eyden, y ta haya pan mainta, cuminda merdia, pan atardi ta nifica cu tur cos ta ok. Semper tin cosnan ta sosode eyden cu nan tin cu wak tur banda. Tin hopi cos cu ta sosode parti paden di KIA cu hopi hende eyfo no sa. Mester check esey, segun Kemp. Ta hopi cos tin cu ta bayendo robes, cu hopi hende no sa.
Manera nos sa, Gerson Martina a huy for di KIA, cual pa algun aña ta sinta eyden, pagando castigo pa un delito cu el a comete. Pero for di Juni di 2018, mester a haya su libertad. Den e caso aki hasta el a haya varios hinca pa cual motibo e por a perde su bida.
Famianan ta conta ki tipo di hende Gerson Martina ta. Mientras cu eyfo, tur hende tin un imagen sumamente peligroso di Gerson Martina.
Tabata importante pa nos como website di pueblo, scucha e banda di medaya di e famia cu kier a expresa y conta e dolornan cu Gerson Martina ta pasa cera den prizon.
Nan ta bisa cu ya caba el a haya seis luna extra riba su castigo, pasobra e mester a sali y ora el a kere cu ta bay cas, el a haya seis luna mas.
Si el a haya un aña mas, e lo mester a sali liber na juni, 2019, pero den augustus ainda e tabata cera den KIA te ora cu el a fada di e situacion y a dicidi di huy.
