Dialuna Minister di Turismo y Salud Publico Dangui Oduber conhuntamente cu nos Minister Presidente mr. Evelyn Wever-Croes, director di APA Marc Figaroa y henter e hunta di supervision di APA tabata na Jaxport na Jacksonville, Florida. Esaki a sosode bou di invitacion di e hunta directiva (Board of Directors) di Jaxport cu tabata cla pa firma un MOU cu Gobierno di Aruba. Esaki sigur ta un momento grandi y historico pa Aruba Ports Authority y pa nos isla.
Jaxport ta e waf di mas grandi di henter e estado di Florida. Cu e MoU aki Jaxport ta bira un partner strategico hopi importante pa pais Aruba. Minister Oduber a indica cu e negociacionnan pa yega na un acuerdo entre Jaxport y APA ya caba a cuminsa tres aña pasa prome cu e pandemia.
Minister Oduber a sigui bisa cu e acuerdo aki ta bay haci posibel pa explora posibilidadnan pa exporta carga for di Jacksonville. E intencion tambe ta pa crea un ruta nobo pa Turismo Crucero y explora e posibilidadnan pa haci inversion den nos waf.
Despues di casi 3 aña di negociacionnan virtual, na januari di 2023 un delegacion di Jaxport a bin Aruba pa prome biaha pa wak nos wafnan. Nan a mira con nos infrastructura ta y tambe nos facilidadnan y nan a keda masha impresiona di locual Aruba por ofrece. Despues di e encuentro aki Gobierno di Aruba a draft un MoU cu a negosha y discuti riba dje. Finalmente management di Jaxport a presenta e MoU aki na nan Board of Directors y esaki a keda aproba pa asina por a firma e MoU aki.
Minister Dangui Oduber a remarca cu e proceso aki tabata largo, desde aña 2020. “Nos ta sumamente contento y agradecido pa tin un partner strategico grandi manera Jaxport, nos mester ta orguyoso con un pais chikito ta logra cera acuerdonan asina grandi” e mandatario a expresa.
Finalmente e mandatario a gradici APA y tambe Minister President Evelyne Wever-Croes pa su presencia y tambe pa kere den e vision cu tabata tin na momento cu a cuminsa e negociacionnan tres aña pasa. E tabata un negociacion largo cu a keda cristalisa cu e firmamento di e MoU. Un acuerdo cu lo bay duna su fruto sigur.
