E siman aki, a presenta un situacion contradictorio den Aruba tocante suministro di coriente. Mientras cu siman pasa, den un conferencia, Minister di Energia, Glenbert Croes, a declara enfaticamente cu coriente no mester bay mas, pero e realidad a mustra diferente, cu un cantidad di corte den suministro di coriente cu a tuma luga.
Alfredo Koolman, director di WEB Aruba NV, a reacciona na es situacion di suministro di coriente, advertiendo cu Minister Croes tabatin un punto importante ora el a declara cu coriente no mester bay mas. Koolman a enfatisa cu tin un necesidad urgente pa limita e cantidad di incidentenan di coriente y pa enfrenta e reto cu distribucion di coriente ta presenta.
WEB Aruba NV a inverti den varios infrastructura, manera e motor di Recip 4, pero e reto mas grandi ta parce di ta den e distribucion mes, loke ta indica cu WEB ta operando na un nivel mas avansa compara cu NV Elmar. Koolman a expone cu tanto WEB como NV Elmar ta confrontando cu un aumento di 10 pa 12% den demanda energetico, forsando nan pa busca sosten necesario pa atende e retonan aki.
Durante un aña y medio, WEB Aruba NV a pasa den un periodo dificil cu e planta grandi di 100MW, confrontando hopi ‘kinderziekjes’ (probleman di inicio) cu a impacta e operacion di e planta y e suministro di coriente na comunidad. Den e proceso aki, WEB a busca contacto cu minister di Energia pa ricibi yudansa y enfrenta e retonan.
Un otro parti di e solucion ta e colaboracion structural den WEB mes, cu dos ekipo ta traha hunto: un ekipo di Wartsila y un ekipo di WEB. E obhetivo principal ta pa mustra resultadonan positivo, un metodologia cu Koolman ta kere cu otro companianan tambe por implementa.
WEB ta expresa su disposicion pa yuda NV Elmar den tur loke ta necesario pa sigura cu e problema di suministro di coriente ta wordo resolvi na e isla.
