E siman aki Minister Geoffrey Wever a reuni cu bestuur di Aruba Fair Trade Authority (AFTA) relaciona cu varios topico. Entre otro, AFTA a presenta na Minister Wever nan jaarverslag incluyendo e jaarrekening di e prome aña di AFTA y tambe e bestuursreglement. Den e reunion entre Minister Wever y bestuur di AFTA tambe a intercambia di pensamento over mencion recientemente di AFTA y e critica riba Setar N.V. door di Comerciantenan Uni Aruba (CUA) den medionan di comunicacion.
Minister Geoffrey Wever a institui y el a bira bira operacional prome di januari 2024 cu e meta pa promove competencia husto entre empresanan. E ley di competencia husto (mededingsverordening) tambe a drenta na vigor prome di januari 2024 y por ehempel ta prohibi pa tin cartel of otro acuerdonan entre comerciantenan cu ta perhudica competencia husto. AFTA ta un entidad cu ta opera independiente di gobierno di Aruba cu tin su mesun autoridad y tools pa actua.
E bestuur di AFTA ta consisti di Roly Sint Jago como presidente, M. Snoep y M. Visser como miembro. Sr. Snoep ta tambe presidente di e autoridad di competencia husto na Hulanda cu ta ACM.
“Mi ta sumamente contento cu AFTA ta operacional y mi ta sigur cu AFTA su trabou lo bay conduci na prijsnan mas competitivo y tambe miho servicio pa nos ciudadanonan. Casi tur pais moderno tin un autoridad di competencia husto y awo Aruba por ta orguyoso cu nos tambe tin uno. A keda demostra den hopi pais unda un autoridad di competencia husto a wordo introduci cu prijsnan a baha y servicio a mehora”, segun Minister Geoffrey Wever.
“E proximo paso ta pa finalisa e ley cu ta agrega consumentenbescherming, pues proteccion di consumidor, na e autoridad legal di AFTA. E ley ta den su fase final y lo tin un impacto sumamente positivo pa tur consumidor na Aruba. Mi ta kere cu prome cu aña 2024 caba e ley aki lo ta aproba”, segun Minister Wever.
Si bo persona kier sa mas di e tareanan di AFTA por bishita nan website www.afta.aw
