Den luna di juli di aña pasa WEB y ELMAR a informa Gobierno di Aruba cu como consecuencia di e aumento di prijs di petroleo riba mercado internacional, cu mester aumenta e prijs di awa y coriente. Gobierno di Aruba a verifica tur calculo y cifra financiero y a duna un aprobacion di 6 luna pa aumenta e prijs di coriente, bou di condicion cu 1 februari 2023 mester revealua esaki, pues e aumento ta valido te cu 1 di februari 2023. E aumento aki tabata necesario pa garantisa e suminstro di awa y coriente na Aruba.
“Mirando cu no tin un aprobacion di Gobierno di Aruba pa un ahuste di e prijs di coriente pa e periodo despues di 1 februari 2023, e facturanan cu ELMAR a emiti over e luna di februari 2023 ta den violacion di e concessievoorwaarden y nos a informa ELMAR na varios ocasion di esaki atraves di varios carta cu mi a manda ELMAR den nomber di mi mes como e minister encarga cu tarifa segun e concessie y tambe den nomber di colega Minister Glenbert Croes cu ta encarga cu energia di Aruba”, asina Minister Geoffrey Wever a duna di conoce.
Ayera Minister Wever a suministra un carta den nomber di Minister Croes y Minister Wever na Elmar pa informa cu nan tin te cu diabierna awor 31 di maart 2023 pa 12:00pm, pa presenta un propuesta financiero pa nos por establece e prijs di coriente desde 1 februari. Prijs di coriente ta halto y ta afecta e costo di bida di tur cuidadano. Banda di esaki e ta un peso grandi pa gasto nan operacional di empresanan cu ta conduci inflacion directamente. Pa e motibo aki, no por ta asina, cu ta cobra un tarifa cu no ta aproba door di Gobierno di Aruba.
Minister Glenbert Croes di su banda tambe ta den dialogo continuo cu Utilities, WEB y ELMAR pa varios siman caba y sa cu e empresanan ta trahando riba un propuesta pa Gobierno y ta confia cu pa diabierna e grupo di compania estatal lo cumpli cu demanda di Gobierno pa bin cu un propuesta nobo.
