Minister encarga cu salubridad publico, Dangui Oduber a mustra cu den e prome aña di gobernacion di gabinete Wever Croes, a haci un inventarisacion di e problema di adiccion di droga y cu a institui un ‘stuurgroep’ cu a reuni cu tur fundacion cu di un manera of otro ta trata cu e problematica di adiccion.
E mandatario a mustra cu na momento cu tin cu trata c’un persona cu tin un adiccion, no ta trata solamente di e persona ya cu su situacion ta afecta su famia, ta afecta su conocinan, e ta afecta sociedad y e ta bira un problema pa gobierno tambe.
Minister a mustra cu su persona ta responsabel pa maneho riba e aspecto aki y cu nan tin tur atencion pa esaki por medio di e ‘social crisisplan’ y gobierno a pone fondo disponibel pa atende cu e problema aki na un manera hopi serio y a aloca fondo pa busca mas sicologo, tambe a aloca fondo pa busca mas siciatra.
Na mes momento lo bay institui un ‘factteam’ cu su trabou ta pa sali y brinda e ‘ambulantezorg’ na e cas cu tin un problema serio c’un persona cu tin un problema mental of problema cu adiccion y tambe gobierno ta bay introduci un ‘centraalmeldpunt’ na unda famianan cu tin un persona den cas cu sea tin problema cu adiccion of problema mental, por yama y tuma contacto cu e centraalmeldpunt pa informa cu nan tin un persona na cas cu e problemanan menciona.
E factteam lo bay na e cas aki pa haci un ‘assesment’ di e situacion y mira si e persona por wordo atendi den su omgeving, ya cu den hopi caso esunnan encarga cu e tipo di casonan aki, ta informa cu mas y mas nan ta prefera di atende c’un persona cu tin problema menta, problema siciatrico, nan no kier exclui nan for di sociedad pero ta kere cu ta miho atende e hendenan aki den nan propio omgeving.
E mandatario a sigui mustra cu e personanan aki ta bira un problema pa nan mes, un peliger pa nan famia, peliger pa sociedad cu nan no por atendi den nan mesun omgeving y e persona aki tin cu wordo interna.
“Tin un preocupacion grandi tambe den comunidad cu tin hopi adicto ambulante riba caya, FMAA ta un caos completo, lamentablemente mi tin cu confirma esaki, y sindicato SEPPA tambe a expresa su preocupacion y nos a reuni na mas c’un ocasion cu e sindicato aki y a reuni cu sr Marlin di e sindicato aki ya cu e trahadonan ta preocupa, ya cu hopi promesa a wordo haci na nan cu no a wordo cumpli.
Den e periodo cu nos ta den gobierno mi persona a trata di resolve varios di e problema y issuenan cu tin na e momentonan aki den FMAA ya cu en berdad nan ta sin capitan, nan ta sin direccion y nos como gobierno tin un maneho cu nos kier hiba y nos kier integra e zorg den un forma cu esaki a bira central y por medio di e factteam nos ta bay haci esaki tambe pa medio di pone mas fondo disponibel, por medio di busca mas profesionalnan, duna training tambe na tur profesional cu ta traha den e area aki,” Minister Dangui Oduber a declara.
E mandatario a sigui mustra c’un e problemanan den FMAA ta cu tin hopi nombracion politico cu a tuma luga den pasado y no tin e experticio of conocemento necesario pa atende cu e adictonan aki.
Minister Oduber a sigui mustra cu diaranson tabatin un reunion cu otro fundacion cu ta hopi conoci den comunidad cu tambe ta atende cu e temanan aki y nan kier yuda pero si kier yuda ya cu pa atende cu e problematica aki, mester di hendenan cu tin e compromiso, hendenan cu tin e curazon y e pasion pa e trabou ya cu no ta un trabou facil.
No ta un problema facil pa deal cune como gobierno, no ta un facil cu por bisa cu tin solucion na man pa bisa cu ta bay soluciona e problemanan aki pero Minister Oduber a sigura cu gobierno ta haciendo tur esfuerso si pa trata di atende cu e problema aki, gobierno ta den e proceso pa trece cambionan necesario den FMAA.
“Tin un posicion habri na e momentonan aki di director ya cu e director actual ta dirigi tambe e departamento di BOV y el a duna indicacion cu e no kier keda mas pa sigui dirigi FMAA pero si ta dispuesto pa keda y yuda na unda cu por y den e proceso ey nos ta awor pa pone un persona capacita pa ocupa e funcion y duna stuuring y leiding na FMAA.
Nos tin un programa cu nos kier sigi tambe y diferente fundacion a acerca gobierno mustrando nan disponibilidad pa coopera ya cu nan tin contacto cu fundacionnan tin ta wordo representa den 150 rond mundo, pues nan tin e conocemento, profesionalismo y experticio.
Hunto cu nan nos kier duna training tambe na e personal, percura pa e facilidadnan drechando esakinan y nos ta den delibracion tambe cu minister di husticia pa nos wak si por bin c’un halfway house cu sigur lo bay bira un discusion publico ya cu mi ta kere cu ningun bario of districto ta desea di tin un opvangcentrum asina pa e adictonan ambulante,” Minister Dangui Oduber a declara.
