Procurador-General di Aruba Alexander van Dam tabata un di e oradornan durante y simposio ‘The Road to Good Governance’.
E simposio aki a tuma lugar recientemente y a wordo organiza pa e fundacion Deugdelijk Bestuur y Universidad di Aruba. E speech di e Procurador-General a trata tocante integridad, particularmente den sector publico.
E daño cu corupcion of falta di integridad por causa na un comunidad, por ta grandi. Corupcion ta daña productividad di sector priva y e eficiencia di instancianan di gobierno. Esey ta hiba na desigualdad social, economico y politico bao di ciudadanonan.
Integridad ta un cuestion di moralidad, pero tambe di confianza den gobierno, den banconan y den companianan y finalmente den funcionamiento di un pais.
Un gobierno integro ta wordo caracteriza pa politiconan integro, asina e Procurador-General a bisa.
Politiconan ta sirbi como ehempel pa comunidad y pa departamentonan di gobierno y e ambtenaarnan.
Ambtenaarnan tambe tin cu duna ehempel y tin cu tene nan mes na ley.
Na 2017 na Paris, OESO (Organisacion pa Cooperacion Economico y Desaroyo) a saca tres recomendacionnan pa prevencion di corupcion den sector publico.
Aruba tambe ta mantene un acercamento reparti den fasenan.
Na prome lugar tin e fase di hisa conocimento y conciencia tocante integridad den gobierno y cerca e ministernan.
Den e di dos fase ta tuma accionnan disciplinario contra politiconan y ambtenaarnan cu no ta traha na un forma integro.
Ta te den e di tres fase Ministerio Publico ta drenta aden.
E Procurador-Generaal a enfatiza den su speech cu Husticia no ta hunga un rol directo den prevencion di corupcion y promocion di comportamiento integro.
Persecucion di comportamiento no-integro mester wordo considera ‘ultimum remedium’, considerando cu e daño a sucede caba na momento cu Ministerio Publico wordo involvi, manera den e caso Ibis cu actualmente ta den Corte. Dor di actua penalmente contra corupcion, Ministerio Publico ta aporta si na prevencion di corupcion den futuro y na sostene e normanan di integridad.
