Minister di Salud Publico, Dangui Oduber, a informa cu Departamento di Salud Publico (DVG) ta activo y ta haci control regularmente na tur supermercado y restaurant.
E mandatario a indica cu na e momento cu DVG ricibi keho di un of otro violacion cu por afecta e salud di nos comunidad, esaki ta wordo tuma na serio y ta wordo controla mesora cu man duro. Un bon higiena ta hopi importante pa salud y bienestar. P’esey e controlnan di DVG ta instrumental. Nos kier garantisa comunidad cu e productonan cu ta wordo consumi ta di bon calidad y tambe cu e fecha di vencemento ta corecto y cu tur documentonan ta na ordo.
Por ehempel algun luna atras DVG a actua riba e keho cu ta trata di e holor desagradabel cu tin den cierto establecimento y cu esaki ta bay riba cierto productonan. Den esaki DVG a cera algun establecimento pa nan regla nan asunto di higiena y alabes duna nan e conseho di con y ki producto nan por uza, pa esaki no sosode mas.
Minister Oduber ta pidi tur doño establecimento pa mantene nan mes na e reglanan di higiena y tin carchi berde na ordo pa asina evita di haya multa y/of mester cera bo establecimento. E controlnan di DVG ta bay keda sosode regularmente conhuntamente cu cuerpo policial.
“Como e minister encarga cu salud e ta mi deber pa garantisa cu tur locual nos comunidad ta consumi ta saludabel y na un standard halto”, – Minister Dangui Oduber.
