Diaranson atardi Minister di Turismo a reuni cu e gerencia y CEO di ATA. Manera ta conoci aña 2020 y 2021 tabata aña nan hopi duro pa e turismo di pais Aruba. Esaki a haci cu ATA mester a cambia strategia y hasta uza fondo di emergencia pa mercadia pais Aruba. Den e reunion aki ATA a presenta locual nan a haci den mercadeo y tambe nan plan y retonan pa cu e mercadeo di nos turismo pa aña 2022.
Minister Dangui Oduber a duna di conoce cu ATA a selecta un agencia nobo di mercadeo na aña 2020 pa reenforsa e strategia cu ta desplega den e area di Norte America, esaki a sosode despues di un proceso riguroso. E evaluacionnan haci riba e diferente agencianan di meradeo y/of promocion ta tuma luga periodicamente. Esaki ta pa sigura cu tur e agencianan cu ta traha pa Aruba y tambe e ekipo di ATA mes keda skerpi, asina e mandatario a trece dilanti. ATA ta keda percura y supervisa cu e agencianan ta cumpli cu e strategianan stipula pa cada mercado internacionalmente. Pa di e manera aki e vision di pais Aruba keda alinea y asina atrae e turistanan cu nos ta desea.
Actualmente Aruba ta trahando cu e compania ‘Engine’ pa cu e mercadeo Norte Americano, ta trahando cu e compania aki desde aña pasa. Minister Dangui Oduber a menciona cu ATA ta satisfecho cu e resultadonan desplega te cu awor pa ‘Engine’ memey di un pandemia. Mirando e retonan nobo di ATA toch a dicidi di cuminsa e proceso pa cambia pa un otro agencia, un agencia cu por pusha e demanda pa Aruba aun mas den e situacion fuerte.
Recientemente, ATA a inicia un trayecto di investigacion profundo, e proceso aki ta pa sigura cu Aruba ta keda lidera den turismo. E investigacion aki ta parti integral di e strategia pa cu e plan di mercadeo di aña 2022. Den e plan aki lo bay evalua tur e mercadonan di Aruba pa mira kico ta e punto di benta di cada un di nan. Di e manera aki captura e atencion debidamente di nos cliente teniendo bon cuenta cu e necesidad y deseo di e consumidor cu nos kier atrae.
Minister Dangui Oduber a trece dilanti cu ATA semper a tuma desicion cardinal a base di dato y investigacion haci. E desicionnan y strategia di ATA semper tabata den consulta cu e minister y e hunta di supervision di ATA, di e manera aki tur ta riba mesun liña. Den aña 2022 ATA lo bay concentra aun mas riba e perfil di bishitante di ‘High Value’. Esaki ta referi na e turista cu ta laga mas placa atras den nos economia. Tambe lo bay enfoca riba e perfil di ‘High Value Low Impact Tourism’, esaki nan ta e turistanan cu ta gasta hopi y respeta nos naturalesa y balornan cultural. Minister Dangui Oduber ta sostene e vision aki, e ehercicio aki no lo ta facil pero sigur e lo ta necesario segun e mandatario.
Pa realisa e vision aki caminda gran mayoria di nos bishitante ta respeta locual ta importante pa nos. No solamente mester enfoca localmente riba educa esunnan cu ta provee servicio y bishita, pero tambe den atrae esunnan cu afinidad pa nos producto turistico, pero tambe cu balor pa locual ta importante pa nos desaroyo duradero.
Minister Dangui Oduber a duna di conoce cu e investigacionnan haci pa ATA lo finalisa na october di e aña aki y lo incorpora e resultadonan di e strategia di comunicacion pa 2022 (esaki ta e punto di benta di cada mercado turistico).
