Turista a tuma contacto cu polis mesora na momento cu un adicto ambulante a pasa man pa su tas cu un suma basta grandi aden.
Esaki a tuma luga den oranan di atardi, den careda di 4:00 pm, ora cu nan a haya nan mes confronta cu un accidente lamentabel pero na mes momento un caso di ladronicia inespera.
Tur esaki den area di playa, banda di Aruba Experience Cafe. E bishitantenan a duna di conoce cu na momento di e accidente un tas lo a cay y un adicto ambulante a probecha y pasa man bay cu esaki. Locual cu tabata e seriedad di e caso ta cu den e tas tabata tin un suma di $1500 cu e adicto ambulante a sali na careda cu ne.
A duna autoridad un descripcion di un homber, su vestuario, cu a resulta despues di ta un adicto ambulante. Mesora polisnan di Playa a drenta den accion y cuminsa cu e buskeda den e area. Den un accion rapido a bin topa afortunadamente cu e homber pero locual no por confirma si a topa cu e suma di placa riba dje. Ta lamenta e sucedido cu a tuma luga cu nos bishitantenan.
