Pa Minister di Turismo y Salud Publico, Dangui Oduber, diahuebs tabata un dia largo. E tabata presente na Parlamento di Aruba pa asina duna contesta na preguntanan tocante e presupuesto di su ministerionan, ademas di scucha e preocupacion y preguntanan di diesnuebe parlamentario cu a hiba palabra. E ta compronde cu e atencion aki ta na su luga mirando cu ta trata di dos di e ministerionan di mas importante, manera ta e pilar economico di nos isla y e salud post pandemia.
“Tabata dos aña hopi dificil cu instruccion di corta den cuido y esey no ta un tarea facil. Pandemia a pone nos den un situacion complica y dificil”, minister Dangui a bisa recordando cu na 2019 tabatin un presupuesto cu surplus, pero despues di pandemia y awo guera, tin mas reto di loke tabatin caba. “Sinembargo turismo ta creciendo, progresando, turismo ta fuerte y recuperando casi nan nivelnan di 2019”.
Danki na esey, e mandatario ta priminti di percura pa economia crece y crea oportunidad nobo cu cuponan di trabou. Como ehempel a duna proyectonan grandi manera Gateway 2030 na aeropuerto internacional Reina Beatrix cu lo ta un ampliacion cu lo crea entre 300 pa 400 cupo di trabou directo y indirecto; mescos cu Port City na e area di waf di Oranjestad pa cual ta spera e destaho publico pa e di dos kwartaal di e aña aki. Mescos cu otro proyecto di embeyecemento y infrastructura di producto Aruba.
“Ta plannan grandi cu nos a pone den presupuesto pa bay ehecuta,” Oduber a bisa. Pa loke ta salud, tin e reto di e instruccion di Hulanda. Ayera den parlamento tabatin hopi discusion riba eigen bijdrage, pero esey ta sorprende e minister ya cu ta un decision tuma pa Gabinete Mike Eman na 2014 den dialogo cu gremionan. “Ta straña nos cu ta husto e fraccion aki tabata esun mas fuerte mientras cu ta nan mes a tuma e decision aki den pasado. No ta un situacion deseabel; mester admiti cu ta hopi reto.
Pa contraresta, e mandatario a menciona e Plan Nacional di Prevención cu a keda cla den 2020, pero cu no por a implementa te aworaki. Un ehempel ta e Landsverordening Tabaksprodukten cu ta prohibi humamento di sigaria na luganan publico y ta hisa e edad pa esaki for di 18 pa 21 aña. Tambe kier bin cu un clinica specialmente pa atende cu problema di obesidad cu lo conta cu dietista y fisioterapeuta, entre otro, pa duna guia na esunnan cu mas ta sufri di esaki. Di e manera ey ta busca pa tin un bida mas saludabel, baha e indice di mortalidad y move e enfoke di cuido medico for di curatief pa preventief. “Mi ta convenci cu miembronan di coalicion lo duna nan sosten na e presupuesto cu nos a presenta,” Oduber a expresa.
Di e mil pregunta cu a haci na gobierno, e ministerionan cuta regarda bou di Dangui Oduber a ricibi 140. A contesta tur por escrito y a pone documento ter inzage. Durante su turno na palabra, e minister a reclama parlamentarionan cu no ta tuma nota di contestanan y ta bolbe lansa e mesun preguntanan durante e reunion cual no ta eficiente. Di su banda, e minister ta satisfecho di a contesta tur pregunta den forma habri y transparente. E ta confia cu dialuna por haya e presupuesto aproba.
