Minister Plenipotenciario di Aruba, Guillfred Besaril, a tene un discurso como orador special na e congreso di Women Leaders International na Den Haag. Esaki a tuma lugar durante un gala dinner, unda e mandatario a papia riba influencia di liderazgo femenino na Aruba.
Sr. Besaril a cuminsa na duna un introduccion di Aruba, su Status Aparte y cu Aruba su industria mas grandi ta turismo. ‘Cada aña mas cu 1 miyon di turista “stay over” ta bishita Aruba y e mesun cantidad ta bishita Aruba cu cruceronan. Asina turismo ta duna trabao na casi 70 porciento di e forza laboral na Aruba. Cifranan hopi impresionante pa un isla chikito manera Aruba, pero tambe ta trece cune un reto enorme. Un di e retonan mas grandi ta pa crea un otro pilar economico di importancia grandi. Sectornan economico manera agricultura, “blue economy” y innovacion ta posibilidad cu e Gobierno actual ta sondea’, asina Minister Besaril a bisa.
Sr. Besaril a toca e tema di liderazgo femenino pa medio di e “Sustainable Development Goals” (SDG’s) di Nacionnan Uni, den cual paisnan globalmente mester curasha hendenan muher. Minister Besaril: ‘Oportunidad igual riba enseñansa, cuido medico, un bon trabao y representacion politico y den desicionnan economico ta sumamente importante pa un desaroyo sostenibel economico y social na cualkier pais. E diferencia entre sexonan na Aruba gradualmente a bira menos den e decadanan cu a pasa, unda progresonan grandi a keda realisa na tur nivel. Hopi hende muher na Aruba a logra kibra e “plafond di glas” door di ocupa posicionnan clave den nos comunidad. Tin hopi departamento di Gobierno cu tin un hende muher na cabez di e departamento, hasta e presidente di Banco Central ta un hende muher. Cu nos tin awe un Prome Minister femenino ta testimonio di esaki! E Gobierno aki a comete su mes pa sigi promove y engrandece e posicion di hende muher den e comunidad di Aruba y asina cana pareu cu movecion global pa mas liderazgo femenino.
Nos Gobierno tin algun plannan di accion cu ta regarda e derecho di hende muher y nan interes. Ta asina cu lo introduci un plataforma pa combati discriminacion contra di hende muher. Tambe lo enforsa e sistema di brinda ayudo na victimanan di abuso y nan famia. Gobierno lo entama un campaña di informacion pa haci mas sensitivo y conscientisacion den comunidad, cu tur clase di discriminacion y violencia ta inacceptabel. Den esaki mi mester bisa cu tin hopi trabao pa haci ainda,’ segun Minister Plenipotenciario Guillfred Besaril.
Finalmente e mandatario a bisa cu e anochi aki ta un momento pa expresa nos sosten ta e movecion pa igualdad y pa curasha hendenan muher profesional den posicionnan halto. ‘Esaki ta un proseso continuo unda nos lo encontra hopi reto. Aruba ta apoya un intercambio manera e congreso aki y ta tene boso bista y recomendacionnan na halto. Pesey mi palabra di aprecio pa boso esfuerso riba e tereno aki y durante di e congreso,’ asina Guillfred Besaril, Minister Plenipotenciario a termina su discurso durante e anochi special di e congreso di Women Leaders International na Den Haag.
Despues e programa a sigi cu un presentacion di un video di Aruba door di ATA Europa y e invitadonan a goza di musica Arubiano y Caribense di Rafael Camacho.
