Minister Plenipotenciario Guillfred Besaril a pone awe 6 di november un flor na e monumento na Waalsdorpervlakte pa conmemora cu awe ta 75 aña cu akinan e Arubiano Boy Ecury a keda fusila pa e Alemannan. Minister Besaril a wordo acompaña pa personal di Arubahuis.

Despues di acto aki Minister Besaril a para keto na e momento aki a bisa cu awe 75 aña ta recorda e momento cu Boy Ecury (dfm) ta perde su bida y ta wordo trece na Waalsdorpervlakte unda hopi cune den e periode ey tambe a sacrifica nan bida pa un lucha pa e democracia cu nos ta den dje awe y e libertad cu nos ta goza. ‘Apesar cu e ta 75 aña despues di e acto aki, hamas y nunca nos mag di lubida e hecho cu awe nos por ta cana liber na unda cu ta aki na Europa y na cualkier parti di mundo democratico. Mi ta bisa democratico, pasobra ainda tin diferente caminda cu conoce guera.’

‘E libertad cu nos ta goza dje ta danki na e sacrificio di homber y muhernan manera Boy Ecury cu den e periode ey di nan bida a dicidi di para pa e norma y balornan di un comunidad cu a bisa cu nos no por biba cu e sentimento cu mi ta cai bou di un otro hende. Na tur e homber y muhernan balente awe nos ta recorda nan danki na Boy; danki na e sacrificio cu ela haci pa libertad y sigur na e orguyo cu e ta laga nos sinti cu ora bo ta akinan na Europa y bo bisa Boy Ecury nan sa – mescos cu den e caso di George Maduro – cu nan ta hendenan di e islanan cu a duna nan bida, cu a sacrifica nan curpa pa Reino Hulandes,’ asina minister Besaril a bisa.

E mandatario finalmente a manda palabra di consuelo na e famia di Boy Ecury cu riba un dia asina bo ta recorda, pero e ta trece cune cierto sentimento di tristeza. Na mesun momento esaki tambe ta trece un sentimento di orguyo na nan.

Comments

comments