Minister Plenipotenciario Guillfred Besaril a mustra su aprecio pa club di futbol Sparta di Rotterdam pa e oportunidad cu e club di futbol ta brinda na tres futbolista Arubano. Nan ta Kymani Hazel, Shivay Wadhwani y Mitchell Laclé. Pa un siman nan ta riba invitacion di Sparta na Rotterdam pa un tryout. E mandatario a bisa esaki durante di su bishita recientemente na e jeugdopledingscentrum di Sparta.
Sr. Besaril a keda ricibi pa Camiel van Hoogstraten Hoofd Jeugdopleidingen Sparta. Sr. Van Hoogstraten a duna minister Besaril un guia den e centro di training, mientras cu e tabata duna splicacion riba e facilidadnan cu e centro ta brinda na e hungadornan di Sparta.
Minister Besaril a bisa di ta sumamente orguyoso di mira cu algun yui di tera por haya e oportunidad aki. Tambe e mandatario ta asombra cu e manera cu Sparta ta haci esaki. ‘Sparta mes ta bai na e islanan cu nan voetbalkamp pa descubri talento. Sinembargo Sparta ta hiba nan conocemento na nos islanan y nan ta identifica talento y ta duna e invitacion – manera ta e caso aki – pa corre un stage y mira con leu nan desaroyo ta pa asina eventualmente si nan por sigi desaroya nan mes profesionalmente cu e posibilidad pa bin Hulanda y goza di e oportunidad cu un club di futbol manera Sparta ta duna nan’.
Sr. Besaril a bolbe ripiti e parti positivo pa Aruba na momento cu talentonan deportivo ta acelera internacionalmente. Minister Besaril: ‘Esaki ta un propaganda positivo impagabel pa bo isla y bo comunidad. Esaki ta initiativanan positivo cu desde e prome dia cu mi a bira minister aki na Hulanda y na Europa mi a bin ta sigi Arubanonan kico nan ta bin ta haci. Aña pasa nos tabata tin e hoben Tromp cu a haci su try-out na FC Twente. Nos mester sigi stimula a accionnan positivo aki.’
Hoofd Jeugdopleidingen Sparta Camiel van Hoogstraten a bisa cu nan tin un par di aña cu nan ta traha hunto cu Aruba Soccer Academy (ASA) pa asina bin cu algun voetbalcamp na e islanan. ‘Parti di esaki ta pa laga e muchanan cera conoci cu e manera di opera di Sparta. Y na mes un momento nos ta mira tambe si tin talentonan cu por bin hunga futbol na Sparta of haci un try-out. Semper si e muchanan tin talento por considera den futuro cu nan por tuma e paso ta parti di e team di Sparta,’ asina sr. Van Hoogstraten di Sparta Jeugdopleiding a bisa.
Tambe presente na e ocacion aki tabata Steve Escalona y Raymond Baten, ambos ta fundador di Latin Caribe Sport Foundation (LCSFound). Steve Escalona ta splica e idea tras di e fundacion aki.
‘Nos a ripara cu tin hopi talento y semper nos a puntra nos mes dicon nan no ta logra bin Hulanda; cu e paso ta hopi grandi, pasobra no tin guia pa e muchanan tuma e paso aki. Nos fundacion tin contacto cu ASA y tambe nos tin un network cu otro teamnan di futbol, unda nos ta crea posibilidadnan pa facilmente mas talento por drenta den contacto cu teamnan di futbol na Hulanda. E meta grandi di nos fundacion ta pa e muchanan haya bon guia y na final nan por tin un carera profesional den futbol,’ segun Steve Escalona di LCSFound.
Nota pa redacion: E potretnan ta cortesia di Cas di Aruba
