Durante e conferencia di prensa diahuebs mainta den cual Minister di Naturalesa, Ursell Arends a trece dilanti mas detaye di su plan nobo pa cu maneho di desperdicio, a indica con departamentonan manera Directie Natuur en Milieu (DNM) y Bureau City Inspector (BCI) lo haya tarea y autoridadnan nobo, a puntra e mandatario si nan ta suficiente prepara cu ekipo y personal pa cumpli cu dicho responsabilidad.
Minister Arends a contesta bisando cu desde cu el a asumi responsabilidad pa ta minister di naturalesa, el a brinda e hermentnan necesario tanto na DNM y BCI y durante 2023, a base di nan necesidad, lo sigui brinda e hermentnan necesario tambe.
Mas aleu a splica cu pa 2023 su ministerio tin un total di 15 vacatura cu mester yena. Den bista di e cambionan reciente, ta bay monitor e evolucion pa mira si tin mester di pone prioridad na otro departamento of si e dos departamentonan aki mester ta mas ekipa ainda pa atende cu e situacion. Sinembargo, Arends ta convenci cu ambos departamento tin e personal y aworaki tambe BCI ta haya e ploegnan bou di nan encargo cu lo facilita nan tarea hopi mas.
Arends: “E departamentonan aki a bin ta conoce un monton di herment. BCI tin e Fixie (app nobo) bou di nan encargo cu ta conecta tur departamento di naturalesa p’asina tene nan informa y di e forma ey tambe ta traha mas estrecho y cerca cu otro,” asina e mandatario a finalisa bisando.
