Riba dia 8 di mei 1961, pues exactamente 60 aña pasa, a funda Arubaanse Stichting voor Reclassering en Kinderbescherming 1961, riba insistencia di clero, Ministerio Publico y Voogdijraad. E pensamento ta cu tur hende tin derecho di por cambia despues di comete un eror. Ademas tin pa purba evita cu un persona por bay of cay bek riba e caminda robes.
“Nos sistema hudicial den tur su facetanan ta di suma importancia pa nos estado di derecho.
Mi kier felicita y yama danki pa e trabou incansabel na tur e empleadonan di reclassering cu ta yuda esunnan cu door di un motibo of otro a faya na caminda, pero cu awor ta cla pa bow guia di reclassering sigui riba e bon caminda bek”, asina Minister mr. Andin Bikker a bisa den cuadro di felicitacion di e departamento aki.
Reclassering ta haci tur lo posibel, den cooperacion cu Ministerio di Husticia, Ministerio Publico, departamentonan di gobierno relevante, instancianan particular y e cliente, pa un proceso di resocialisacion, rehabilitacion, sosten y reintegracion den comunidad. Reclassering ta situa den Caya Ernesto Petronia 21-C na Oranjestad.
