Den cuadro di por promove mas libertad di prensa y pa por garantisa un miho forma di traha entre e cuerponan hudicial y prensa local, awe Minister Andin Bikker a topa cu e Asociacion di Prensa di Aruba. Pa e mandatario ta importante cu e organisacionnan por traha banda di otro, sin stroba, cu e meta pa tin un comunidad miho informa. “Tabata un tremendo reunion, den masha bon ambiente y hopi productivo. Mi ta spera di por yega na un decision pronto”, asina e mandatario a expresa na final di e reunion.
E reunion a tuma luga awe entre Minister di Husticia mr. Andin Bikker, Procurador-General mr. Bote ter Steege, Altocomisario Vanessa Kock, Relacionista Publico di Cuerpo Policial Aruba, Lito Lacle y varios representante di e Asociacion Arubano di Prensa ASAP, entre otro Norben Giel di masnoticia.com, Mark-Benson Denz di 24ora.com, Roland Rossini Tromp di arubanative.com y Richard Lacle di awe24.com.
Temanan cu a atende ta entre otro e posiblidad pa introduci un asina yama politieperskaart y lo kier explora pa yega na un protocol entre KPA, OM y ASAP pa e forma di traha ora di incidente y casonan. Ademas a delibera referente un of otro forma di ‘pers alert’ den dicho contexto.
E reunion tabata masha constructivo y a palabra cu lo reuni regularmente y ya a pone un fecha pa topa prome cu fin di october.
