Empleadonan a kere cu awe lo tabatin un decision final den e caso di bancarota di La Linda.
E empleadonan ta kere cu La Linda no mester wordo declara bancarota pa motibo cu tin suficiente propiedad pa por cubri e gastonan. Nan a compronde cu e director sr. Hopman tin hopi propiedad pa bende y por haci hopi cos prome cu yega na e punto di bancarota.
Parce cu tin un problema entre herederonan unda un grupo kier pa declara La Linda bancarota y otronan no. E empleadonan ta bisa cu La Linda no por tuma e rumbo aki y por sigui operacion, mas ainda awo den temporada di crisis.
Trahadonan ta malcontento pasobra tin un curator pero nan no ta mira cu tin placa den circulacion pa nan tambe haya nan pago. Tur cos ta keda den man di e bewindvoerder aki.
E problema a cuminsa na momento cu Corte a kita apoderacion di e executeur apunta door di e fayecido propietario di La Linda, debi cu e otro grupo di heredero a dicidi di bay Corte.
Na final por a compronde cu La Linda a entrega un proposicion pa paga esnan cu nan debe. A base di esaki Hues a dicidi cu tur hende of instancia cu ta bisa cu La Linda debe nan, mester entrega nan documentonan na e Curator prome cu dia 5 di November. Dia 11 di December lo tin un reunion pa vota con ta bay realisa e pagonan.
