Despues cu GoA/RdA a conclui e terminacion cu Citgo dia 30 di April 2020, y cu RdA por a cuminsa na entretene e esfuerso pa traha di inmediato riba huur di e tankinan den e terminal, a cuminsa cu fast-track-tender entre e 40+ entidadnan cu a keda registra na tanto GoA como RdA. Durante mei 04 y 05 a acerca tur e interesadonan pa participa den un tender pa huur tanki, cual tender a cera diabierna mei 15. Despues, a base di e ofertanan ricibi, a scoge e miho ofertanan pa inicia negocacion y yega na un contract.
Asina tambe a inicia cu e esfuerso pa yega na un contract cu un cliente cu a interesa pa lease tur tanki cu tabata disponibel y den condicion pa opera di inmediato. Aki a sigui un proceso poco largo caminda finalmente dia 14 di augustus a firma un contrato cu un duracion di 12 luna, y cu e posibilidad di extende esaki cu 12 luna mas. Mester bisa tambe cu e cliente aki su oferta tabata substancialmente mas atractivo cu demas ofertanan ricibi.
Despues cu e contract a keda firma e cliente mester a cumpli cu cierto condicionnan stipula den e contract pero a enfrenta contratiempo pa cumpli cu e condicionnan. Esaki entre otro ta pa por pone un garantia na banco y/of otro institucion financiero (performance bond) den caso no ricibi cu pago di un factura na tempo. Di acuerdo cu e terminonan y condicion di e contract vigente a procesa tambe e facturanan corespondiente na e cliente pa pago. Na momento cu e cliente mester a paga, e cliente a confronta diferente situacionnan inespera. E cliente a solicita RdA pa tempo pa por soluciona e asunto aki.
Bou condicion di bon voluntad a otorga e cliente e tempo pidi pa por resolve e asunto. Despues cu e tempo a yega y e cliente no a yega ainda na e solucion, y di acuerdo cu e condicion stipula den e contract, a cuminsa cana e caminda di un curing period. Si e cliente no resolve e asunto aki den e tempo stipula, lo anula e contrato di inmediato.
Den anticipacion di e posibilidad aki RdA a cuminsa pulsa mercado inmediatamente y ta den negocacion cu un otro cliente caba cu ta cla pa yega na un contract asina cu e tankinan ta disponibel atrobe.
Pues, concluyendo, RdA, despues di a tuma over e facilidadnan bek ta sigui garantisa suminsitro di producto pa mercado local y ta atendiendo cu reparacion urgente y necesario di e facilidad. Den e proceso di tender pa huur di e tankinan, RdA lastimamente a experiencia un tardansa no premira y fuera di control di RdA pero RdA lo sa di sali di e situacion aki pronto mirando cu a notifica e cliente di e consecuencianan, y asina lo por cuminsa crea actividad economico pa Aruba.
