“Pa critica cu tin bes tin den comunidad nos mester para keto tambe y admira e trabao duro y dedica di esunnan den cuido na Atuba. Un experiencia personal cu salud di mi señora Doina e dianan aki a trecemi bek na momentonan cu nos a comparti y convivi cu mi defunto mama den lucha pa su salud y e reflexionnan cu Bo ta haci na momentonan asina”, e lider di AVP, mr. Mike Eman a expresa den un mensahe dunando un reconocimento na e trabao duro y dedica cu dokternan y enfermeranan den cuido na Aruba ta percura pe.
Mike Eman: Canando den e pasiyonan di nos hospital, bishitando esunnan den lucha pa nan salud y nan famia den anciedad pa nan ser keri, ta profundisa mi sentimientonan cu pa nos por haci un diferencia pa esunnan cu nos ta stima, cu nos mester tey semper un pa otro. Ta hustamente e momentonan ey e atencion profesional y humano ta hopi crucial. Eman ta mustra cu e mesun sentimientonan aki e tin tambe pa nos enfermeranan den cuido di nos grandinan. E fin di aña aki atrobe Eman por a aprecia y admira nan dedicacion trahando riba dianan di fiesta di casnan di nos grandinan. Si Bo mira cu cuanto atencion y cariño nos grandinan ta wordo cuida y yuda bo no por otro cu keda cu un admiracion pa e trabao dedica di nos enfermeranan.
Ex Prome Minister Mike Eman den su periodo di gobernacion a percura pa enfermeranan di casnan di nos grandinan maneha pa SABA por a incorpora den e sistema di pensioen di APFA. Pa enfermeranan y empleadonan ya caba riba edad di pensioen, e Gabinete di Mike Eman a crea e tempo ey un pakete financiero cu voluntariamente esunnan cu kier a bay cu pensioen lo no a baha man bashi, manera cu e tabata prome cu e areglo cu e tempo ey Prome Minister Eman a percura pe hunto cu sindicato SEPPA. Te hasta cu hopi tabata sigui traha cu edad halto pasobra prome cu e pensioen y e areglo cu Eman a bin cune nan no por a bay cu pensioen, pero mester a sigui traha pa sostene nan mes.
Ex Prome Minister Mike Eman ta bisa cu pa nos enfermeranan tanto den Hospital como den SABA y pa nos dokternan den hospital y priva, nos tin cu keda duna e aprecio y atencion mereci, pasobra ta un trabao noble ta worde eherci pa cuida y cura nos sernan keri.
