Hopi compania na Aruba tin reglanan di cas cu empleadonan of subcontratistanan mester firma na momento di yega na un relacion di trabou. Apesar di esaki, tin hopi cuestionamente riba un forma cu un persona ta wordo retira “op staande voet” pa test positivo pa droga y alcohol.
Recientemente tabatin veredicto di un caso cu a sosode na WEB Aruba N.V. E persona cu a test positivo ta traha pa un sub contratista di WEB y ora cu el a test positivo, a dicidi di retir’e mesora. Apesar di e regla, cu e tabata na altura di dje, e empleado (contratista) en cuestion, a dicidi di bay Corte. Pero su demanda a keda rechasa tambe.
E empresa Felipe Construction & Consultancy N.V. (FCC) ta haciendo trabou pa WEB riba tereno di e compania aki. E demandante (trahado) tabata apunta pa haci trabou pa FCC riba tereno di WEB. Den e acuerdo firma cu WEB ta papia cu e empleadonan ta bay di acuerdo pa pasa den test di droga y / of alcohol y esaki ta wordo haci durante oranan di trabou na cualkier momento. Esaki ta para den e acuerdo. FCC di su banda a informa su empleadonan trahando na WEB tambe di esaki.
E motibo cu WEB tin e regla aki ta pasobra nan kier brinda su empleadonan un ambiente liber di efectonan negativo di droga y alcohol. P’esey ta prohibi pa empleadonan raporta na trabou bou influencia di droga y/of alcohol.
E test riba e empleado di FCC a wordo haci dia 12 di augustus, 2019 den oranan di mainta y den oranan di atardi e laboratorio en cuestion a informa cu e test a sali positivo pa cocaina. E siguiente dia mes el a haya su carta di retiro inmediato.
Corte ta menciona cu dia di e test, e empleado di FCC no a cumpli cu e maneho di zero-tolerancia di WEB. Niun momento a keda demostra cu e empleado no tabata na altura di e regla. Tampoco a trece dilanti ni proba cu e no tabata sa cu e lo haya su retiro di inmediato ora e test positivo.
Corte ta di opinion cu si bay den bodemprocedure mes, nan lo conclui cu e empleado door di a test positivo pa droga a duna nan motibo pa e wordo retira.
Pues tur e peticionnan di dje: sigui pague su salario for di 13 di augustus, 2019 te ora cu e acuerdo di trabou finalisa di un forma legal, pague salario atrasa cu interes legal y pa lague sigui traha, a keda rechasa pa Corte.
Por compronde cu e retiro pa e motibo aki no ta algo cu ta ancra pa ley, pero cu e ta regla cu companianan ta pone, principalmente companianan unda cu e trabou cu ta wordo haci mester tuma luga cu tur tipo di siguridad posibel, pa no pone bida di hende na peligro. Pero por ehempel, na hotelnan tin acuerdo cu e empleadonan ta haya chens, door cu nan mester bay un curso di rehabilitacion, y hasta ta haya un di tres chens si nan bolbe cay. E ta interesante pa haci un test case y mira cual regla ta bay mas leu of tin mas peso.
