E siman aki studiantenan di Aruba lo sali pa Hulanda, Corsou, Merca, Colombia, Costa Rica, Canada y otro destinacionnan pa sigui nan estudionan avansa y specialisa den varios ramo. Tur aña esaki ta un momento masha special, pa famia hasta emocional, pa despedi di un ser keri cu ta bay integra den un otro pais y cultura, pa studia pa algun aña. E bon ta cu nan ta esunnan cu den algun aña ta regresa, cla pa sigui traha duro pa nos pais y hiba nos na e siguiente nivel di crecemento y desaroyo.
“Mi ta desea tur e hobennan aki masha exito mes. Na e mayornan, mi sa e sentimento, pasobra mi tambe a spacha mi yiu muhe algun aña pasa pa Hulanda. Pero kere mi, awe mi ta e tata mas feliz di mundo cu mi yiu muhe cu su diploma di Basis Arts den man y cla pa sigui studia pa bira un specialista”, asina e mandatario a conta.
El a bisa e mayornan: “Tin dos ultimo regalo cu nos por entrega nos yiunan. E prome ta un bon rais y e di dos ta halanan pa por bula pa explora horizonte nan nobo”.
Na e hobennan, e actual Vice Minister Presidente di nos pais a splica cu tin un cantidad di oportunidad awendia na cas. Tene cuenta cu separa di turismo, cu Aruba ta birando un centro di conocemento, cu nos ta cla pa comparti cu mundo henter. Corda cu nos tin un refineria habriendo, pues estudio den ramo petrolero ta ideal. Tambe pronto lo cuminsa explora gas y petroleo den nos awanan teritorial, pues estudio den e ramo ey tambe ta interesante. Asina tin un cantidad di otro oportunidad den ramo di telecomunicacion, ramo di utilidad y asina por sigui menciona.
“Haci boso best! E diploma ey ta di Bo e ta, di ningun hende mas. Y tur loke cu drenta bo cabes, ningun hende hamas por sak’e bek. Exito y spera di topa Boso pronto bek den funcionnan ehecutivo, dirigiendo nos pais”, asina Minister Ing. Mike de Meza a termina bisando.
