Diahuebs tabata un reunion sumamente interesante, riba un topico caminda e minister di turismo a bin parlamento pa busca un aprobacion pa haya un apoderacion, pa yega na un acuerdo y haya e autorisacion pa bay paga un compania cu tabata representa y organisa Aruba Music Festival, 2.1 miyon florin, ta loke cu parlamentario di AVP, Mike de Meza a indica durante un entrevista den Enfoke.
Henter e periodo cu a transcuri riba e topico aki ta 14 aña largo, caminda el a inicia na 2009/2010, na momento cu e minister e tempo ey, minister di AVP, Otmar Oduber, a haya cu e contract aki no ta ‘rechtsgeldig’. Cu e contract aki tabata firma riba un manera straño cu e no ta para tras di dje y a dicidi di termina e contract aki.
Ta un contract cu e ex-minister di MEP, e tempo aya a firma net prome cu eleccion, di cuater aña, cual ta 2010/11/12 y 13, cual ta suma un total di mas of menos 4 miyon dollar cu ta un tiki mas cu 7 miyon florin.
De Meza a indica cu pa shete aña largo, Otmar Oduber a trata e caso aki. De Meza mes a trat’e pa algun luna y despues Dangui Oduber a trat’e pa seis aña, kende ta e minister autorisa pa trata e caso aki.
Ta un lastima pa mira aworaki bin parlamento, busca aprobacion pa paga 2.1 miyon florin cu De Meza sigur tabata contra di esaki fo’i comienso ora el a haya e documentonan aki, pasobra ta inaceptabel cu aworaki Aruba tin cu bay paga e suma aki pa un decision cu por ta e minister anterior a tuma cu no tabata adecua.
Lastimamente cu e caso a keda dura asina largo cu na fin di dia a acorda riba un cifra di casi 900 mil dollar y a bin adicionalmente casi 300 mil dollar acerca. E cifra aworaki cu a propone diahuebs na parlamento pa bay paga, ta un cifra desproporcionalmente halto y cu AVP sigur no tabata di acuerdo cu esaki.
Pa mas detaye lesa TREMPAN.
