E dos entidadnan, forma pa tres hoben Rubiano studiando of bibando na Hulanda, esta CariBang y Deal Entertainment, a organisa e di dos edicion di e evento “Paranda Rubiano – Indoor Festival” diabierna anochi manece diasabra den Maassilo na Rotterdam. Ta conta cu riba dos mil Rubiano a topa otro den un celebracion sin igual.
E organisadonan a percura pa atrae un elenco di artista bou hopi demanda aki na Hulanda, cu ta Jeon, Blacky, Galloway, Easy B, Kulchaman & Fanatiq, sin lubida un lista di DJnan Rubiano studiando of bibando na Hulanda. Tur a uni den e evento.
Pero Jeon, cu a biaha for di Aruba, a yega cu un sorpresa pa tur Rubiano. El a trece su amigonan Ir Sais di Boneiro y Kilate Tesla di Corsou. Nan tres a caba di lansa un produccion nobo, cu a haya e nomber di “Caribe 2.0”. E tresnan a presenta riba escenario, haciendo e publico presente hopi orguyoso di e union cu ta existi entre e tres islanan ruman.
“Nos tin cu realisa cu nos tur ta islanan chikito. Pero ora nos uni, nos ta bira un pais grandi y ta esey mes nos a haci awe y cu intencion di sigui haci mas di e produccionnan aki hunto”, asina Jonathan Thiel, conoci como “Jeon”, a bisa durante un entrevista despues di su presentacion den Maassilo.
“Nos a spera hopi hende awe, pero esaki a surpasa tur expectativa”, tabata e prome reaccion di Edson Tromp Jr. El a studia pa “Event Producer” pa algun aña na Regionaal Opleidingscentrum – ROC van Amsterdam y debi na su entusiasmo y perseverancia y su forma unico pa logra su proyectonan, a pone cu na final e scol a tum’e na trabou como “Productie Begeleider” pa e sigui guia e demas studiantenan den e mesun ramo.
Tabata un placer y orguyo pa mir’e den accion na Hulanda. El a percura pa un produccion unico, sin lubida ningun detaye. El a atrae poco di su studiantenan pa yud’e y asina laga nan cera conoci cu e realidad di produci evento, mas den practica cu den teoria. Su dos socionan den e evento, Eldwin Kock (Caribang) y Anthony Arends (Deal Entertainment) tambe tin un amplio conocemento den organisa eventonan grandi, pues e combinacion di talento, experiencia y creatividad a traduci den Paranda Rubiano 2, cu por mira atras na un exito rotundo.
Otro aña tin atrobe? “Otro aña? Mi ta kere cu e publico mester keda pendiente prome cu esey caba, pasobra e aña aki ainda nos lo organisa un otro evento pa nos Rubianonan aki na Hulanda. Tin demanda pa bon fiesta y nos ta cla pa cumpli cu e peticionnan. Y claro, pa otro aña por premira un Aruba Dag hopi mas grandi ainda”, di acuerdo cu Edson Tromp Jr.
Aña pasa a organisa e prome edicion di Paranda Rubiano den Reverse Rotterdam y a logra acumula 500 persona den e fiesta. E aña aki, mara na un bon promocion y tremendo elenco musical, a logra surpasa 2000 persona den Maassilo Rotterdam. A keda demostra cu compania of gruponan priva, cu nan mesun inversion y creatividad, ta logra organisa eventonan asina mas eficiente, mas economico pero cu miho rendimento, compara cu ora Gobierno di Aruba mes organis’e via ArubaHuis.
E evento a conta cu diferente climax musical, tanto di trempan cu e DJnan presentando, como e cantantenan despues. Cada un a maneha su publico, cu a contesta cu aplauso y grito di alegria. E organisadonan a parti e evento den seccionnan y tabatin e parti di cuminda y bebida, pero crioyo. Ey por a come croket, cheeseballs, Johnny Cake, pan cu carni stoba, pan cu bacalao y sin lubida e sopi cu pan bati.
