Un di e motibonan cual amargura por presenta ta door di falta di pordon, cu vengansa, cu pleito, cu rabia, e ta contagioso, y no ta boluntad di Dios, no tin crecemento spritual den dje y amargura ta kibra tur bon relacion social cu un hende por tin.
P’esey palabra di Dios ta bisa nos: “Laga tur amargura, furia rabia, griteria, y calumnia, wordo kita for di boso, hunto cu tur malisia. Sea cariñoso cu otro,misericordioso, pordonando otro, mescos cu Dios den Cristo tambe a pordona boso.”( Efesionan 4:31+32).
“Ma awor boso tambe mester pone un banda rabia, furia,malisia,calumnia, y palabra sushi for di boso boca.”( Colosensenan 3:8).
Un hende amarga ta bisa cu e ta pordona , pero e no ta lubida, pasobra ta imposibel reconcilia cu un persona, caminda e persona ta pidi disculpa of pordon, y toch e otro ta sigi persigui y sigui recorda e asunto y cada rato menciona locual cu a sosode den pasado, pa asina purba di rebaha e persona y halsa su mes, den e caso ey amargura ta domina bida di un hende asina.
Amargura ta un cos cu nos tin di saca for di nos cas, pasobra e ta contamina henter bo cas, specialmente ora mayornan ta keha, murmura, zundra constantemente e mesun spirito ta move riba e yiunan, kende lo pleita, zundra y hasta bringa, pasobra ta esey ta locual nan ta mira sosode den cas.
Ta boluntad di Dios pa nos pordona otro mescos cu Dios a pordona nos, pa asina nos oracion por yega shelo,pasobra palabra di Dios ta siña nos den Marco 11:25 y ki ora cu boso ta para haci oracion, pordona si boso tin algo contra un hende, pa boso Tata cu ta den cielo tambe pordona boso, boso trangreshonnan.
Ora nos ta haci oracion ta bon pa nos pidi Dios kita tur amargura y falta di pordon for di nos pa asina nos drenta den presencia di Dios cu confiansa, y asina tur locual nos pidie cu un curason yena cu gratitud nos lo ricibi.
Caminda tin inmoralidad, hopi biaha capricho y amargura ta presenta, pasobra hopi biaha hende ta parce manera nan ta brasa un cadushi cu hopi sumpiña , cu nan sa cu ta haci nan dolor, pero toch nan no kier arepenti.
No laga ningun palabra dañino sali for di boso boca, sino solamente palabra cu ta bon pa edificacion, conforme e necesidad di e momento pa esaki por duna gracia na esun cu ta tende.( Efesionan 4:29).
Hopi discusion, ofensa y maltrato ta causante di stress, depresion y amargura, pasobra hende no por biba scuchando tur dia cosnan negativo riba nan bida.
Amargura ta aparta hende for di Dios, ta stroba oracion di yega shelo, ta stroba bo di tende bos di Dios, pasobra amargura ta fria hende spiritualmente.
Door di zundra un mucha tur dia bo ta hacie amarga , abo mes ta cera porta di comunicacion entre bo yiu y abo.
Tin hopi caso cu amargura ta bira asina grandi y e ta causa abandono di hogar, tin hopi mucha riba caya ta haci malo pa motibo di amargura, cu nan a sali cas cu ne, pasobra nunca tin aprecio pa nan na cas, tin solamente keha y rechaso.
Rabia y no haci pica, medita den bo curason riba bo cama, y keda keto. Ofrece e sacrificionan di husticia y confia den Señor.( Salmo 4:4).
Compronde esaki mi rumannan stima. Tur hende mester ta lihe pa tende, y no lihe pa papia y no lihe pa rabia.Pasobra rabia di hende no ta produci e husticia di Dios.( Santiago 1:19-20).
No paga malo cu malo, pero vence e malo cu bon.
Sinceremante, Pastor Marcel Balootje.
