E locual a tuma luga den parlamento diamars ultimo, unda cu a entrega un mocion di desconfiansa contra Minister di Labora, Energia y Integracion Glenbert Croes, tabata un show of wega cu e parlamentario di Accion21 no tabata interesa pa cay den dje.
Despues cu a haci e peticion un aña y dos luna pasa pa e mandatario bin duna cuenta y splicacion di su maneho intransparente pa cu admision, el a presenta diamars finalmente den parlamento. E reunion a dura henter dia.
Loke cu e mandatario no a spera ta cu inmediatamente na inicio e lider di fraccion di MAS, drs. Marisol Tromp, a entrega un mocion di desconfiansa contra dje.
Remarcabel ta cu e reunion aki a conta cu apoyo di fraccion berde (AVP), kendenan tur tabata presente na e reunion publico.
Pero e votacion tabatin un sabor agri-dulce (sweet and sour) pa iniciador di e mocion, Tromp.. E votacion a sali cu apenas 8 voto na fabor y 12 voto en contra. Coalicion completo a vota contra dje, incluso un parlamentario independiente, Rycond do Nascimento.
Pero loke cu a hala atencion ta cu Miguel Mansur tabata presente den e reunion, sinembargo ora cu a menciona su nomber, no a scucha su bos cu el a vota. Pa e motibo aki a puntra e propio parlamentario ta kico a pasa. E ta un di e personanan cu semper ta fuerte cu critico pa cu maneho, no solamente di gobierno pero di e ministernan tambe. Y su splicacion tabata simpel.
Mansur a conta tabatin tres mocion contra e maneho di Minister Glenbert Croes, di cual un di nan tabata pa termina confiansa den dje. El a vota na fabor di solamente un di e mocionnan aki.
Mirando cu coalicion ta den su mayoria, MEP y RAIZ no ta den pleito aworaki, no tabatin ningun chens cu e mocion di desconfiansa y bah’e e minister lo por a pasa. “Mi a considera esey mas bien un show politico,” el a comenta.
El a prefera di haci uzo di su derecho pa vota na fabor di e mocion unda ta pidi pa regularisa esunnan indocumenta. Di e forma aki ta pone presion riba tur miembro di parlamento pa tuma un postura di ta pro of contra un maneho di e indole aki. “Mi a duna mas balor riba e punto aki, cu participa den un show politico,” el a comenta.
Na momento di votacion Mansur a dicidi pa no keda den sala pa vota pro of contra. Y a prefera di sali pafo.
Tocante Miguel Mansur
Miguel Mansur ta un inversionista cu a bira un politico, despues di funda su mesun partido. E ta boga pa un politica nobo cu gobernacion confiabel na Aruba cu di berdad ta traha pa pueblo. El a studia na Serie Colorado School na Aruba, despues a sigui International School of Aruba, despues a sigui Institut Le Rosey y finalmente gradua di Tufts University na Medford, Massachusetts (USA). El a caba e estudio di International Relations and Economics. Desde aña pasa e ta presidente di Capitable LLC, cu oficina na Miami, Florida. Desde october 2020, Mansur a funda Partido Accion 21, a participa den eleccion na juni, 202. Y el logra no menos di 2019 voto riba su nomber.
Tocante Accion21
Miguel Mansur a funda partido Accion21 na december 2020. E ta e prome partido cu ideologia liberal progresivo. E kier tuma un rumbo nobo y diferente cu esun social democrata cu ta reinando. Un rumbo unda tur hende tin acceso na nan derechonan den forma realistico, husto y sostenibel bibando segun nan potencial individual, sin lubida esunnan desampara pa via di burocracia y discriminacion sistematico. El a presenta un lista di 14 candidato. Nan lema ta: Solucion ta cuminsa cu accion. Den nan prome salida, e partido a logra 3410 voto, bon pa un asiento. Despues di e victoria, no menos di tres candidato a tuma nan retiro, debi na diferencianan di opinion cu e lider. Pa colmo ta e tres candidatonan cu a haya mas voto, despues di Mansur mes.
