A combersa cu Ronny Alders cu ta encarga cu coordinacion di e simposio educativo di sostenibilidad. Lo tin anochinan di lectura cu lo cuminsa desde di 25 di april na Cas di Cultura y lo ta un evento pa publico general entrada ta gratis. E simposio ta cuminsa pa 7:00 pm y portanan ta habri pa 5:30 pm
Alders a agrega cu Biblioteca Nacional Aruba (BNA) ta focus pa varios aña riba e parti di sostenibilidad cu varios iniciativa manera “Hoffi Joy” cu ta dedica na e parti di agricultura, pero tambe recientemente a inaugura e parti di arte sostenibel den forma di ceramica pa e artista Omaira Silva.
Ta trahando riba un schedule cu publico lo ta bonboni pa bishita e hofi na edificio di BNA, caminda lo por disfruta di e naturalesa, y cu facilidad di WI-FI gratis. Igualmente lo tin oportunidad pa hobennan por experencia arte sostenibel bao guia di Enrita Werleman pa medio di trahamento cu ceramica cu ta tuma luga di 2:00 pa 5:00 pm di dialuna pa diabierna na BNA.
Esaki ta un forma pa stimula hobennan di Aruba pa bira artista di arte sostenibel cu actualmente tin un posicion importante na mundo, conoci tambe como “orange economy”.
Alders a enfatisa cu lo tin tres evento grandi durante e siman di 22 pa 26 di April tanto na Biblioteca Nacional y Cas di Cultura y publico ta bon bini pa asisti.
Astrid Britten Director di Biblioteca Nacional Aruba (BNA) a comenta cu durante e simposio a invita diferente persona conoci den comunidad cu lo comparti nan conocemento y experencia riba e area aki entre otro Rendell de Kort cu ta un economista conoci y tin conocemento riba e tema aki. Di parti di United Farms Aruba lo ta presente Gregory Fung-A-Fat y Roselinde Barros-Poels cu actualmente ta un di e motornan di plantamento na scolnan basico cu ta sosode riba varios diasabra. Tambe lo conta cu presencia di Ludwig Rasmijn cu ta labora na Santa Rosa.
Segun Britten: “Nos kier empodera e studiantenan, empodera nan cu informacion.”
Nathalie Maduro directora di Santa Rosa a elabora cu nan organisacion tin 10 aña ta trahando conhuntamente cu BNA. A mustra cu e ta un conferencia di hopi balor.
Maduro a enfatisa cu e tipo di conferencianan asina tin hopi balor, specialmente pa studiantenan na e scolnan secundario cu lo tin cu scoge den ki direccion nan tin cu studiante. Durante transcurso di añanan a pone atencion riba diferente tema: “aquaponics”, “hydroponics”, y plantacion general.
Awendia por wak cu pocopoco e interes ta crece bao di hobennan pa agricultura, E directora a mustra cu durante e temporada di pandemia di covid un di e actividadnan cu a bira importante ta plantamento na cas, e hendenan tawata tin tempo pa dedica na esaki debi na e circunstancianan cu a sosode durante e epoca di pandemia.
Maduro a enfatisa cu mester realisa con vulnerabel nos isla ta, debi cu basicamente Aruba ta depende di importacion pa casi tur cos cu tin di haber di alimentacion.
