Desde cu mr. Gerlien Croes a anuncia cu ta bira parlamentario independiente y lider di Accion21 a mustra su interes p’e forma parti di su partido. E ta interesa pa nan traha hunto.
Miguel Mansur, lider di Accion21, a indica den un programa di radio XFM cu Croes ta un politico fantastico y cu talento. Cada partido politico di Aruba ta desea di tin e. El a sigui indica cu Croes sa cu porta di Accion21 ta habri p’e. Tambe e ta spera cu e parlamentario independiente join e y asina ey nan no mester debati contra otro.
E parlamentario ta di pensamento cu Croes ta den un posicion sea e tin su mesun partido of ta join uno existente, cua lo ta miho p’e. Mansur a enfatisa cu porta di Accion21 ta habri p’e parlamentario independiente.
Shark Gario, locutor, a puntra Mansur si e lo baha como lider di partido pa laga Croes dirigi nan. Segun Mansur, en caso Gerlien haya mas voto, mirando cu ultimo eleccion su persona a haya 2019 voto y Croes 1919, e lo dun’e e liderazgo di partido.
Na momento Mansur a bira politico, un compromiso cu el a haci ta keda den politica ocho pa diesdos aña, maximo. Su siguiente preocupacion ta pa e siguiente lider di Accion21 join nan pronto. E ta haya cu e no por pensa un miho lider. Mansur a enfatisa cu Croes ta un politico cu talento. E parlamentario ta keda para na su palabra riba e echo di e curashi y balentia cu el a tuma di declara su mes parlamentario independiente, a inspir’e. Pasobra e ta haya cu tin mas cu ta purbando di haci un cambio.
