Durante e prome siman di februari 2023, un grupo di persona, cu mas di 14 aña pasa, a inverti den e Proyecto Acqua Condominium Aruba (actual Hotel Radisson Blue) den varios medio di comunicacion a denuncia di ta sinti nan mes “damnifica”. Motibo di esaki ta door di un negociacion cu despues di tanto aña ainda no a yega su fin. Esaki a pesar di cu e contractnan original seya door di notario ta establece cu e cumpradonan ta 100% doño di e apartamento- y e areanan comun di e residencia.
Algun di e cumpradonan, entre nan e pareha Adriàn Bianchi y Susana Matte, a bay Corte y a ricibi un sentencia na nan fabor; pero e desaroyado, Venancio Gonzales, na mas di un ocasion a nenga di cumpli cu e sentencia di no solamente di Corte di Aruba, sino tambe di Corte di Apelacion (na Corsou). Aki ta unda cu tres hues a ratifica e entrega di e apartamentonan bou di e contract original.
Ademas di no respeta e cumplimento di e sentencia hudicial, kier obliga e cumpradonan (bou di e palabra colaboracion) di firma un anexo cu ta anula radicalmente e derechonan adkiri den e contract original (manera doño di e pool, parkeerplaats, e tereno y e clubhouse). Niun di esaki ta na interes di e cumpradonan y nan lo perhudica nan grandemente.
Abogado di algun di nan a renuncia n’e caso bisando cu entre otro, cu ta no por obliga niun hende na cumpli cu e veredicto duna door di Corte. Ta bon pa menciona cu e abogadoaki ta pertenece n’e bufete ARULEX, cual bufete ta e mesun abogadonan cu, segun e cumpradonan por a compronde, a redacta y ta maneha e contractnan di compra-benta, cual ta un indicacion di cierto incompatibilidad pa atende cu e caso. Nan ta e mesun abogado cu ta defende ACQUA y e abogadonan demandante na dado momento a traha hunto den e mesun oficina. Esaki ta haci cu mester puntra si ta bale la pena busca husticia si no ta cumpli cu e sentencianan?
Tin algun cumprado cu te cu awo no a acudi na husticia en busca di nan derecho y tampoco a ricibi nan apartamentonan debi cu nan no a firma e anexo. Hopi di esunnan afecta, ta haya cu e grupo aki a haci bon di no firma. Pasobra na momento cu nan firma, en bes di beneficia nan, e lo perhudica nan notablemente. Como ehempel, nan ta expone e caso di un propietario cu, bou di presion, a firma e anexo y awo mester acepta e condicionnan estricto cu Radisson Blue ta impone riba nan, cualnan ta 57% di e huur pa nan y e gastonan di comunidad, reparacion y mueble ta pa cuenta di e propietario. Esaki ta haci cu ta imposibel pa haya un entrada pa e huur di e apartamentonan y mucho menos bende nan na prijs di mercado.
Awo, a pesar di a cumpra un Condominium, e cumpradonan cu a firma e anexo ta haya nan ta obliga di biba den un hotel (contract firma entre Acqua y Radisson tra’i lomba di e cumpradonan original y te ainda e cumpradonan no a haya e documento aki pa nan studia). E gastonan di esaki ta impagabel, un burla pa tur esunnan cu, di buena fe, a kere den un anexo udna cu no a establece e condicionnan previo di e funcionamento di e hotel.
Den resumen: Acqua Condominium (of Radisson Blue) no ta entrega e propiedadnan cu ta ful paga caba, pasobra cu nan ta exigi pa firma e anexo. Un anexo n’e documento di comprabenta cu, segun e specialistanan ta viola e derecho di e cumpradonan y ta faborece e desaroyado notablemente, y cu ta ilegal for di cualkier punto di bista.
E pareha Bianchi Matte a sigui bisa cu e desaroya a notifica algun di e clientenan cu e lo ta dispuesto na entrega, pero ta insisti riba e firma di e anexo, ta nenga cu tin cualkier caso gana de corte. E ta bisa tambe cu e leynan di Aruba no ta permiti un particular di huur pa su cuenta, loke ta totalmente falso. Tambe e ta bisa cu e su sistema ta priminti ganashi extraordinario, cual ta algo cu nan ta pone den duda pa loke a bisa anteriormente.
Por ultimo, e cumpradonan ta sinti nan mes inconforme cu e actitud di e desaroyado di Acqua Condomio Aruba y e manera di procede di algun abogado y otro personanan envolvi den e negociacion. Pa tal motibo nan a contrata e servicionan di mr. Carol Helen Lejuez, pa pidi husticia pa tur e inversionistanan cu un dia a soña di tin un propiedad riba nos One Happy Island.
