Accion21 kier trece un claridad riba algun punto pa cual nan a pidi un reunion riba e aumento di BBO, e asina yama Reforma Fiscal di Minister Xiomara Maduro.
Por a wak cierto movecionnan straño entre e parlamentarionan di partido MEP, cu ta buscando manera di zorg (fix) nan mesun situacion, prome cu bin eleccion. Miguel Mansur, lider di Accion21 a bisa cu Minister Xiomara Maduro t’e unico minister cu kier bin c’un ley na december pa comercio implement’e na januari. Asina no ta duna oportunidad na niun di e parlamentarionan pa studia e ley aki y bin cu preguntanan relaciona cu e ley, corda pa bay di acuerdo cu e ley aki en cuestion.
Mas aleu, Mansur a cuestiona tambe e problema na RWZI, cu ta un desaster natural y cu ta forma un menasa grandi pa nos industria di turismo. Aña pasa, Minister Ursell Arends a bin parlamento pa bisa cu no por privatisa RWZI, cual ta gobierno mes mester bay inverti den dje. Pero Minister Xiomara a bay cu e 16 miyon di Minister Arends y atrobe e minister encarga cu RWZI ta bin parlamento pa bisa cu nan ta bay en busca di un business case pa busca inversionista pa hinca placa den RWZI, es decir, pa privatis’e.
Loke Mansur ta cuestiona ta e echo cu aña pasa, e mesun minister aki, Ursell Arends a bin parlamento pa bisa cu no tin un business case pa RWZI y cu ta gobierno mes lo mester pomp placa den dje. P’e parlamentario, lider di fraccion di Accion21, e gañamento ta sigui. E ministernan mes ta gaña te cu nan mes ta lubida kico nan a bisa y nan no por keda riba e mesun liña. RWZI ta e menasa di naturalesa mas grandi pa nos industria di turismo y pa nos isla en general.
Pa loke ta cuido di Adulto Mayor, esaki tambe tin su retonan cu ne. Tin tur sorto di problema den cuido di anciano, nan a haya un baño di awa friu. Tin un tapamento pa e barco no sink ainda, y Mansur no sa kico e parlamentarionan ta warda pa bula afo. Gobierno mester saca su conclusion y no por come for di dos tayo.
Pa loke ta campaña, Miguel Mansur a bisa cu Accion21 ta cla pa campaña. Ta for di december 2021 caba nan tin un plan di emergencia pa cu campaña y cu awor nan lo mester acelera e plannan di campaña. E ta sigur cu pa 2023, Aruba lo ta den campaña electoral un biaha mas.
