Durante clausura di Aña Parlamentario 2021-2022, varios ta e parlamentarionan cu a hiba palabra pa asina trece nan punto di ordo dilanti.
Miguel Mansur, lider di Fraccion di Accion 21 a indica cu Parlatino tin como 16 comision permanente y e ta funciona di tal forma cu cada parlamentario di Aruba por join dos comision. P’esey durante un bishita na Parlatino, un pais grandi manera p.e. Uruguay ta manda un representante di gobierno y uno di oposicion pa cada comision. Aruba por sigui e ehempel aki y asina e gastonan di biahe ta baha significativamente. E parlamentario por bay dos reunion.
Mescos, Mansur a sigui bisa, ta conta pa IPKO, tanto Corsou como St. Maarten ta manda unicamente e lider di fraccion pa representa. Aruba, en cambio ta bay c’un delegacion di 11 persona. E ta e delegacion mas grandi y un biaha e tabata hasta mas grandi cu esun di Hulanda, cu ta exagera. Un critica ricibi hopi biaha, ta tocante snoepreisje. Pero manera cu e ta organisa aworaki, e critica ta na su luga.
Pa loke ta pregunta, Mansur a haci 426 pregunta di cual 175 no a ricibi contesta. Funcionamento di Parlamento ta bira debil, ora cu Parlamento no ta haya respuesta riba e preguntanan. Un minister cu e pio record pa contesta pregunta ta Minister di Finansa, cu tin e cartera mas importante tambe. Otro sugerencia ta cu, Parlamento tin hopi comision y algun di nan nunca ta reuni. Ta bon pa reduci esaki y organisa nan segun e LIM, riba conseho di Raad van Advies.
VIRTUAL
Un posibilidad ta pa haci e reunionnan di Parlatino y IPKO virtual. Durante pandemia Parlatino tabata ofrece esaki virtual cual no ta e caso mas, ya cu nan ta prefera pa tur bini hunto. Pero pa loke ta IPKO, kisas e parlamentarionan cu no bay, por hacie virtual, pero si tin un balor agrega, pa reuni den persona. Tin e reunionnan formal, pero tambe tin e networking y tambe e reunionnan informal, cu ta sosode pafo di IPKO. P.e. ora ta traha riba e afsprakenlijst , COHO y RAft, el a reuni cu e parlamentarionan Hulandes, cual ta dificil pa haci den un scenario virtual.
DISCURSO Pa loke ta discurso di Gobernador di diamars, pa Mansur ta importante pa e discurso refleha e pasonan cu lo tuma pa cu e menasanan di Aanwijzing. “Ta spera cu gobierno lo cuminsa cumpli cu CAft y nos obligacionnan”, tabata e palabranan di Miguel Mansur, lider di Fraccion di Accion21 den Parlamento.
