Gerencia di Latin Passion, Michel Maduro, a reacciona riba e incidente di ayera nochi unda cu G. “Tio” Lopez y Maria “Mia” Figaroa a fayece, mientras cu e otro dos damanan ta na hospital luchando pa nan bida. Awo tin un investigacion andando riba e sucedido. Un par di dia despues cu e luganan por a habri, a kita coriente for di e bar. Como cu no tin coriente, a pone un generator.
Tio Lopez ta biba den e luga y na varios ocasion el a bisa Michel Maduro, doño di Latin Passion, pa nan pone un generator. Segun Maduro, el a bisa pa no haci esey y pa warda te ora e cera placa pa por paga Elmar.
Segun Michel Maduro, e tin mas o menos 3 siman cu e no ta bayendo San Nicolas y via otro hende el a bin tende cu desde diabierna Tio Lopez a pone un generator den su bar. E no tabata sa nada, pero ora a mira via Facebook cuenta cu e luga ta draai bek, Maduro a kere cu Lopez lo a paga e coriente. Diamars anochi el a presenta na e bar y a bin topa cu e generator. Di biaha a bis’e pa paga e generator y pa warda 2 siman mas.
Un amigo a presenta diaranson anochi na e bar y a bin topa cu Lopez tira riba vloer, Figaroa patras di bar, un di e damanan riba sofa y e otro benta abou. E scenario tabata hopi conmovedor.
Segun Maduro, e ta sospecha cu ta un trahado di Elmar a instala e generator pero no por habri e luga te ora cu DTI caba cu su investigacion. El a sigui bisa cu a manipula na e fuse box, a kita kabel y a haci yen di conexionnan straño pa por a conecta e generator riba e sistema di coriente di e bar. E ta haya cu e “instalado” aki awor mester para responsabel pa tur locual a sosode.
