Michealline Kock a papia cu su rumannan pa nan cana e caminda legal cu e situacion fastioso cu nan ta den dje cu e famia Croes pa saca nan. Tur dia den e ultimo 3 pa 4 siman e mester a yama polis y tambe ta ricibiendo demasiado keho di bisiñanan. E bisiñanan aki ta tuma contact’e pasobra nan a haya menasa y nan mes no ta yama polis. Nan ta haci desorden cu auto y musica, pero tambe ta cana drenta cas y menasa nan. Tur esaki ta relaciona cu un cas / apartamento cu ta huur cu un pareha hoben na Hooiberg.
Michealline Kock ta bisa cu e hendenan aki no kier bin dilanti pasobra nan ta hende grandi y ta biba nan so. Por tin problema cu un hende, pero henter e bario. Tur bisiña tin problema, el a bisa. Nan tin boca ora nan ta bou uzo di substancianan di alcohol y blanco. Asina so nan ta cuminsa menasa hende.
Un di e bisiñanan cu ta huur un di e apartamento, kende e Croesnan a menasa, a bisa Kock cu e ta bay muda pasobra e no por biba mas cu e situacion. Den e trailer cu e ta huur, e no por sosega. Loke Kock ta haya hopi lamentabel den e varios biaha cu polis a yega, ta shake hands cu nan. Kico nan ta bezig cu ne? Pakico polis t’ey e ora? Pa ta friends & family? Ta yama polis, toque de queda a cuminsa, tin musica. Polis ta yega, papia cu nan, sali bay y musica ta sigui toca. Si haya hende riba caya, e ora si e toque de queda ta conta pa nan haya 1000 florin di boet pero p’e hendenan aki no.
Tin cu puntra ki clase di husticia tin na Aruba. Nan kier pa polis actua. Kock tin 3 yiu, 1 baby, cu ta den examenklas y mester bay cerca hende pa siña. Cada rato e yiu tin cu perde soño te ora cu nan haya ta bon pa bay drumi 2’or of 3’or di marduga. Di ora cu e hendenan aki lanta te 12’or di anochi nan no tin sosiego. Cada rato nan ta bou di menasa.
