Nos redacion a tuma nota di un declaracion di e director suplente di Meteo algun dia pasa y esaki ta crea mas pregunta cu contesta.
E hefe suplente a indica cu Servicio Meteorologico di Aruba ta un departamento meteorologico y no sismologico. Pues nan tarea ta meteorologia.
Loke ta zona straño ta cu e instellingsbesluit di Meteo su doelstelling ta indica (dat de doelstelling van het Departamento Meteorologico Aruba is het zorgdragen voor de landelijke gegevens, informatie en kennis van meteorologische, klimatologische en andere geofysische aangelegenheden), ademas si tira bista riba meteo su website ta indica (Departamento Meteorologico Aruba de officiële bron is geworden voor alle meteorologische, seismologische, en klimatologische gegevens) http://meteo.aw/wxabout.php. Pues ta di lamenta cu al momento tin un director suplente na Meteo Aruba cu sa ni e tarea di su mesun dienst of e tareanan relaciona cu e formatieplaatsing y asina tin mas awendia.
A tuma contacto cu Funvisis y otro sismologonan den e regio. Esakinan a indicanos cu ta dificil pa bisa cu exactitud unda precies e temblor lo tabata ta. E datos di e geophone (citizen science seismogram) for di cual nos redaccion a obtene datos ta indica cu berdad un temblor a pasa banda di 12.05 am juni 3, 2019, pero uno hopi debil. Nan ta remarka tambe cu prome cu 2018 Aruba tabata brinda hopi datos sismologico correcto for di Meteo Aruba. Adicionalmente seismografnan cercano manera di Curacao y Paraguana no ta mandando datos den exterior actualmente. Pues ta bira dificil pa wak un sismo debil. Nan a indica si cu tin manera pa hasi uso di un seismograaf, pero esaki mester tin componente X,Y, y Z. E geophone tin solamente e componente Z. Nos ta corda cu den pasado ora a instala e seismograaf na San Nicolas cu fondonan di UNESCO, e experto di sismologia cu a instala e sistema a indica cu e seismograaf na San Nicolas conhunto cu e software avansa por indica su so unda un temblor ta, pues sin cu mester 3 seismometer. Pero parce cu awendia ningun empleado di Meteo sa con pa traha cu e software nan y nan no tin e estudio nivel sismologico tampoco pa esaki.
Aki nos ta publica e datos di e sismo debil. Expertonan a indica tambe cu e signal ta tipico di un sismo local y no di zonidonan den atmosfera.
Lamentablemente Meteo su website ta ofrece masha poco datos y mayoria di links no ta funciona y sigur pa sismo e ta morto.
A compronde tambe cu varios datos meteorologico y di lama cu antes meteo tabata brinda na departamentonan di gobierno of ngos, awendia Meteo Aruba no ta duna mas. Mas aleu nos ta corda di un proyecto inovativo cu ex Minister Mike De Meza a laga atras na Meteo, pa Meteo por simula condicionan di lama cerca di nos costa y haci modulacionan pa oil-spill y sargassum. E proyecto aki a costa basta placa di pueblo, pero a muri un morto forza awor pa di motibonan politico. A compronde tambe cu Minister di Educacion a purba tur manera di trece e proyecto aki abou di Educacion Y Ciencia pero e no por a logra esaki lastimamente pa Aruba.
E experto Arubiano mes cu pa ley te ainda ta director di Meteo y ta e unico meteorologo na Aruba a worde poni na disposicion di Ministerio di Educacion. Esaki ta crea e pregunta cerca nos, si ta asina gobierno di Aruba ta actua pa combati e fenomeno di brain-drain na Aruba? Pakiko busca arubanonan studia ariba nivel academico halto pa bin yuda Aruba anto ta hala un experto un banda y pone amigonan di Ministro cu no ta carga ni e base academico necesario pa mantene un servicio meteorologico funcional. Pa colmo dia pa dia Meteo su informacionan ta bira menos y menos pa pueblo y e pronostico ta parce mas bien un copy paste di Curacao. Pa colmo awo ta parce cu ni e tareanan principal di Meteo e director suplente nombra dor di Minister Romero di MEP sa.
Cu ki cara e gobierno di MEP ta bay hulanda busca di obtene hobenan of expertonan bin traha na Aruba? Pakiko nan lo bin, si nan educacion y experiencia no ta wordo aprecia.
