Recientemente a tuma luga un ceremonia festivo pa asina MetaCorp por a recorda cu no menos di 35 aña pasa, Jacky Feliciana a drenta den servicio permanente di e compania. MetaCorp ta e unico compania netamente Arubiano cu ta existi pa mas di 100 aña continuo. E evento a tuma luga na Balashi Garden.
Jacqueline Norine Feliciana, conoci como Jacky, a cuminsa traha cu MetaCorp dia 12 di october 1987 como recepcionista. Trahando seis luna como recepcionista, a acerca Jacky pa bay traha cu Intermodel Container Services (ICS). Cu mucho gusto el a acepta e reto nobo aki y a bay traha na ICS pa diesocho aña. E añanan a pasa lihe, unda el a traha agradabel, duro y tambe manera un famia. E tempo ey ICS tabata dirigi pa Gerardo de Veer, hunto cu Myrtha, Diana, Sharine, Mirella, Inger, Marlene y Jacky. Segun Jacky ta conta, esey tabata e añanan great cu hopi bunita y dushi recuerdo. E ta gradici tur colega di MetaCorp e tempo ey y ta recorda e team como “Simply the Best.”
Despues cu Intermodel Container Services (ICS) a cera su porta, pa motibo cu e agencia di barco a stop su servicio, Jacky a bay traha na oficina di ATCO Shaba (awor ta carga nomber di APEX). Aki el a traha den departamento di benta.
Na aña 2009 Jacky a cuminsa traha cu Ecotech Aruba den e departamentlo di Accounting, pero awo e ta trahando como Sales Representative na Ecotech Aruba. Jacky a demostra cu unda pon’e, e ta bay e extra miya pa su trabou. MetaCorp y EcoTech ta gradici na Jacky pa su 35 aña di servicio y cu semper por conta riba dje. Contento y cu aprecio, Jacky ta gradici ful e compania pa ta un team dinamico.
Su buki preferi ta “Who Moved my cheese? di Spencer Johnson, mientras su musica preferi ta di New Age pero tambe e canticanan di aña 80 y 90. Jacky su mensahe na un y tur ta “Live, laugh & love. Haci bon y no mira ken!”
Tocante Ecotech Aruba
Ecotech ta existi desde aña 1985 y como tal ta un pionero den e industria di maneho di desperdicio. Ecotech ta ofrece un variedad di ekipo manera toters, wastebin, waste bucket, garbage compactor pa colecta desperdicio comercial & residencial. Fuera di colecta desperdicio, Ecotech ta ofrece servicio septico tambe. Ecotech ta ekipa cu trucknan di e marca Mack, cu ta trucknan super moderno.
Na aña 2009 a crea Ecotech Freezone, cu un planta di separacion profesional y unico den Caribe. Desde cinco aña caba nan ta encarga pa procesa un gran parti di desperdicio na Aruba, tanto esunnan comercial como residencial. Ta haci esaki cu gran exito. E ekipo completo di Ecotech ta enfoca pa conscientisa y contribui door di recicla y promove un medio ambiente limpi y duradero.
