Recientemente Jordan Victoire, FIFA Development Officer pa e region di Caribe, a haci un bishita na Aruba. E meta di e bishita tawata pa por discuti algun asunto operacional concerni cu desaroyo di Aruba como miembro di FIFA den cuadro di e FIFA FORWARD PROGRAM pa e ciclo 2023-2026, pero tambe pa presencia e progreso di stadion Guillermo Prospero Trinidad caminda pronto Aruba lo por ta huesped di weganan internacional cu un stadion aproba door di FIFA.
Pa AVB ta di suma importancia pa cumpli cu e exigencia aki. Pa motibo cu cumpliendo cu e exigencia aki, FIFA lo release fondonan cu AVB ta bin na remarke p’e. E fondonan aki lo wordo uza pa mehora e infrastructura di futbol en general aki na Aruba.
Despues di varios reunionnan cu FIFA, a logra convence FIFA cu mester inverti fondonan den mehoracion di e infrastructura di AVB su clubnan miembro. Durante e bishita e pone esaki tambe den e Contract of Agreed Objectives, cu lo wordo firma entre AVB y FIFA. Victoire a haci uso di e oportunidad pa su mes tuma nota di algun necesidad den infrastructura general di e clubnan na Aruba. A determina cu ta existi un necesidad grandi den diferente aspecto, di e tipo di tereno cu ta hunga y train riba dje, te cu luznan, falta di facilidadnan higienico (toilet facilities) y tambe mantencion general.
Hunto cu Directiva di AVB, Victoire a repasa e status actual di tur e clubnan y a haci un bishita na algun tereno di club cu den e proximo lunanan lo bin na remarke pa algun cambionan sumamente positivo. Mester bisa cu tur club cu ta miembro di AVB por spera algun mehoracion den un of otro forma den nan infrastructura, aunke cu esaki ta bay tuma su debido tempo ya cu e rekisitonan di FIFA ta hopi estricto pa por sigura un proceso transparente y cu ta cumpli cu normanan di bon gobernacion.
Tambe mester remarca cu clubnan lo wordo evalua a medida di rekisitonan recomenda door di FIFA mes pa por implementa cambionan a base di un sistema di criteria neutral y visibel pa tur hende. Den e lunanan nos dilanti lo inicia cu reunionnan cu clubnan miembro y tambe lo ricibi bishita di consultant- y expertonan for di FIFA, cu lo guia AVB den e trayecto aki.
AVB ta sumamente contento di por anuncia cu e desaroyo aki ta bay conoce cambio pa miho pa tur nos clubnan miembro, aunke claro e proceso aki ta uno extenso y lo bay tuma algun luna pa por realisa. No obstante e prome stapnan a wordo haci y por bisa cu AVB ta mas cerca cu nunca pa cumpli cu e meta pa haci cambio structural pa mehora nivel di futbol riba nos isla.
