Prome Minister Gilmar Pisas di Corsou a laga sa awe cu, manera el a anuncia desde e prome dia, e asunto cu Hulanda diripiente ta habri pa elimina e medida di 12,5% di ambtenaarnan ta mara na condicion. Mientras cu Gobierno di Hulanda a anuncia solamente tres condicion den e relato di prensa, awo ta resulta cu mester cumpli cu como ocho condicion prome cu por bay di acuerdo cu esaki. Pa colmo, Conseho di Minister di Reino Hulandes ta depende di conseho di CFT pa por tuma un decision. Y tur tres isla, tanto Corsou mes, pero tambe Sint Maarten y Aruba, tin un lista largo di condicion pa por cumpli cu nan ainda.
E prome mandatario di Corsou a señala cu loke e comunicado no ta bisa ta e condicionnan bou di cua e eliminacion di e reduccion di 12.5% lo por tuma luga. Contrario na e Prome Minister di Aruba, e premier di Corsou, Gilmar “Pik” Pisas, a opta pa no reacciona mesora y a warda e bishita di Alexandra Van Huffelen, cu a tuma luga dia 25 mei 2022, pa asina por a haya una aclaracion riba cierto di e condicionnan aki.
Tin di e condicionnan aki ta punto cu Gobierno ta di acuerdo cu nan, pero tin cierto di nan cu mester di evaluacion prome cu fiha un posicion riba nan. Pa e motibo aki tambe Gobierno a instrui su Minister Plenipotenciario den Conseho di Minister di Reino pa wanta tratamento di e punto aki te e proximo reunion di Conseho di Minister di Reino.
E condicionnan bou di cual Gobierno di Corsou por elimina e reduccion di 12.5% ta:
- Por cuminsa elimina e reduccion di 12.5% na momento cu e ley cu ta regula e entrada di personanan den funcion halto di entidadnan liga na Gobierno di Corsou (Landsverordening normering topinkomens Curaçao) drenta na vigor;
- Ora tin tambe e fondonan den propio Presupuesto di Pais pa elimina e reduccion di 12.5% y no por hacie cu fondonan di sosten di likides. Pa por haci esaki, mester entrega un peticion na Colegio di Supervision Financiero (CFT) pa evaluacion;
- E focus pa por kita e reduccion di 12.5% mester ta concentra riba e personanan cu menos entrada;
- Ora tin suficiente espacio pa elimina e reduccion di 12.5% completamente for di Presupuesto di Pais – si acaso no tin otro desaroyo inespera – no por haci un solicitud riba e articulo 25 di e Ley di Reino di supervision financiero;
- Mester duna ehecucion rapido na e medida B.5 di e Pakete di Pais cu tin e meta pa reduci e “public wage bill”;
- E reduccion di 25% pa mandatario y parlamentario ta keda vigente;
- E salario di empleadonan publico despues di elimina (parcialmente) e reduccion di 12.5% no por surpasa e salario di e mandatario y parlamentario cu tin e reduccion di 25% ainda vigente;
- Por cuminsa cu e reduccion di 12.5% solamente despues di un desicion di Conseho di Minister di Reino caminda cu Colegio di Supervision Financiero mester establece cu Corsou a cumpli cu e condicionnan.
Gobierno di Corsou a laga sa di lo keda den consulta cu Secretario di Estado Alexandra van Huffelen y su team y a manda informa Parlamento tambe di e condicionnan ariba menciona. Lamentablemente cu aki na Aruba, Gabinete Wever-Croes a opta pa keda keto y di no a habri carta cu parlamento y cu pueblo. Cu e condicionnan aki, ta bira dificil pa por cumpli prome cu juli pa e medida riba ambtenaarnan por keda pa pasado.
