Durante conferencia di prensa di partido y fraccion di AVP, drs. Mervin Wyatt-Ras a reacciona riba Evelyn Wever-Croes. Esaki den cuadro di e investigacion andando riba supuesto accion of “handelingen politico” di Liesje Khemlani den Parlamento. Tin un carta firma door di Evelyn Wever-Croes dirigi na Khemlani.
Wever-Croes tabata kier pa griffier di Parlamento, firma dicho carta mientras Griffier no ta altanto di e asunto. En bes di a consulta cu Parlamento segun procedura, ta tuma accion directo door di minister presidente. Pa medio di e carta ta “ontzeg” of prohibi e personal en cuestion for di diferente tereno, edificio y propiedad di Parlamento. Den e carta ta menciona alabes cu esaki ta debi door cu e persona aki ta sospecha di supuesto accion politico esta “mogelijke politieke handelingen”. Kiermen e no ta sigur di e acusacion. Esaki ta un forma di persecucion politico. Den e caso aki ta griffier di parlamento mester dicidi pasobra ta trata personal di Parlamento. Esey ta e procedura corecto pasobra si bo kier trece integridad den nos pais y garantisa un estado di derecho manera mester ta, ta necesario cuminsa cu bo mes y actua segun procedura corecto.
Segun nos reglamento di orden articulo 11. inciso 1. Ta indica: 1. Aan de griffier wordt de leiding van de griffie alsmede het beheer over de huishoudelijke aangelegenheden van de Staten en over de boekerij opgedragen. 2. De voorzitter, bijgestaan door drie leden, daartoe jaarlijks door de Staten te benoemen oefent hierover het toezicht uit. Deze commissie wordt genoemd de Commissie voor Huishoudelijke Aangelegenheden (CHA). Claramente por saca afo cu griffer ta na cabes di personal y si algo mester sosode ta griffier ta indica pa haci esaki y banda di e griffier tin e presidente di parlamento asisti door di e miembronan di e comision di asunto domestico cu ta supervisa loke griffier ta haci. Kiermen di ningun manera no por “bypass” ni griffier ni e presidente di parlamento y CHA. Pero e gobierno aki si ta haci asina. Si al dado caso mester resulta cu tin cu yega na un of otro investigacion riba un of otro personal, esaki mester sali for di griffier di parlamento, e ora ey minister en cuestion por firma. E decision aki lo mester tuma conhuntamente cu griffier, presidente y CHA.
Si scucha bon for di e miembronan di CHA y for di nos tambe como parlamentario ningun hende di CHA no tabata envolvi den e proceso aki y Evelyn a bay sinta riba stoel di presidente di parlamento y tuma e decision aki.
Segun Wyatt-Ras no ta bay p’e asunto “as such” pasobra na momento cu tin cierto cosnan ta pasa den parlamento mester investiga, pero mester bay na e forma cortecto. Ki mishi un minister presidente ta traha un carta pa un personal di parlamento y ta pone riba su plataforma di gabinete cu e ta representa, caminda e ta bisa cu e empleado di parlamento ta suspendi pendiente investigacion y e ta bisa tambe cu despues cu a tuma nota di e trabounan politico a cuminsa un investigacion y a confronta e empleado cu prueba. E investigacion ta sigui su curso.
Kiermen e ta propaganda cu e ta haci e investigacion sin consulta cu parlamento. Esaki ta indica persecucion politico y na momento cu e personanan of e hefenan di departamento no ta cumpli cu e norma di friends and family di Evelyn Wever Croes y su grupito e ora ey “la doña” ta tuma e decision y hala e persona en cuestion un banda, conhuntamente cu su secuasenan.
Segun Wyatt-Ras tin cu para keto cu ta un derecho di nos como cuidadano y empleado (publico) cu na momento cu nan ta cuestionando bo, bo tin caminda pa cana. Tin hoor en wederhoor.
Den e caso ta trata parlamento of hoog college cu ta na caminda pa bira independiente y cu minister presidente sa bisa cu boca grandi cu mester independisa Parlamento, awe ta resulta cu e no ta respeta e hoog college y ta bay sinta y dicidi pa parlamento. E ta indica e ora mescos cu a bin ta sosode den diferente entidad den cual ta pone diferente hefe di departamento un banda. El a sosode caba na NV ELMAR, WEB NV, AZV, hasta na hospital kier hala e director un banda. Na DIMAS a zorg cu e director na cabes, kende ta un persona integro, conoci pa hopi aña a wordo hala un banda y awor aki Liesje Khamlani kende tin 30 aña ta traha na parlamento. El a asisti varios miembro di parlamento, Evelyn Wever-Croes tambe, pa haci nan trabou. Sinembargo na e momento aki door cu su vision politico personal no ta cuadra cu Evelyn su vision politico, ta hal’e un banda pa investiga y persiguie.
Segun Parlamentario Wyatt-Ras pueblo mester ta bon informa di e asuntonan aki. Na e momento aki, integridad ta wordo uza door di Wever-Croes como un norma pa exclui esunnan cu no ta “friends and family”. Integridad a bira norma pa screen esunnan cu ta friends and family y esunnan cu no ta. Wyatt-Ras kende semper ta para pa integridad ta di opinion cu mester salvaguardia integridad y no friends and family.
Pasobra integridad ta un palabra grandi cu Evelyn Wever- Croes tin den su boca. Integridad ta na momento cu bo ta cumpli cu balor y norma segun procedura cu mester tin transparencia, cu ta papia e berdad. Anto esaki Wyatt-Ras ta kere cu Wever-Croes no por cumpli cu n’. Den e caso aki el a purba tira e griffier di parlamento bou bus. El a gaña cu ta e griffier di parlamento a acerc’e pa asina e firma e carta, locual no ta cuadra cu realidad.
Nos di fraccion di AVP ta keda reacciona riba esaki pa motibo cu nos no por acepta den nos comunidad cu gobierno bou capa di integridad ta bin y ta atacha nomber di persona cu tin un cierto posicion den nos comunidad y acusa nan pasobra no ta di acuerdo cu nan opinion of trabou. Wyatt-Ras ta di opinion cu na momento cu un persona en berdad haci algo cu no ta corecto, tin cu cuestion’e. Pero e mester bay na e forma of procedura corecto.
Evelyn mester stop di gaña riba otro. E mester siña papia berdad.
E uzo di integridad como norma pa midi esunnan cu no ta su friends and family ta inacceptabel den un estado di derecho democratico, segun Wyatt-Ras.
