Parlamentario di fraccion di AVP drs. Mervin Wyatt-Ras den un declaracion duna papia di no ta kere mucho den e meta di prome minister pa declara luna di april pa conscientisa riba abuso di mucha. E ta mira cu e pensamento real ta campaña
Awor cu tin hopi critica riba maneho riba tereno social, tambe pobresa, cu ta afecta salud mental di nos muchanan y tambe insiguridad pa muchanan cu tin cu keda na so of cerca un familiar no confiabel door cu mayor(nan) tin cu traha, Evelyn Wever Croes ta core lansa un luna di conscientisacion. Wyatt-Ras no ta critica e profesionalnan riba e tereno, sino gobierno cu no ta haci su trabou. Ta obvio cu sector social no ta riba lista di prioridad di e minister encarga cu Asuntonan Social, kende ta procedente di Cuerpo Policial.
Den presupuesto di 2024 minister aki a dirigi su mes mas tanto riba e area di Husticia y a laga e area social manera un huerfano un banda. E ta prefera di cumpra auto en bes di paga pa edificio di Centro pa Hoben y pa atende cu esunnan cu tin salud mental.
E argumentonan pa introduci un Crisisplan tabata un farce y basa riba mentira. Awor Evelyn ta admiti y ta bisa cu“tin diferente estudio y analisis haci, loke bo no ta weita ta cu cifranan ta bahando”, “pero esey nos tabata sa tambe na principio,” segun minister Wever-Croes. Kiermen aki e ta admiti cu e tabata sa cu su argumento no ta corecto. “Con e señora aki por bisa cu a mitiga casonan si ainda sector social no tin un sistema uniforme di registra casonan. Pasobra tin un sistema di monitoria cu a ser anuncia cu fanfaria na Directie Volksgezondheid, sinembargo te ainda e otro departamentonan no tin un sistema uniforme di registracion. Hasta e centraal meldpunt cu ta Sostemi despues di di Crisisplan no tin un sistema uniforme pa registra, mientras esey ta e meta principal di Sostenemi.”
E parlamentario ta sigui bisa cu no a traha tampoco na cooperacion efectivo entre diferente instancianan. A uza 38 miyon pa djis pone un make up of show pa sector social kere cu ta haya atencion, lagando cooperacion y registracion sin atende.
E victima di abuso di menor merece miho. Awor e minister presidente cu no ta encarga ni cu e area social ni cu husticia ta core bin padilanti pa tapa tur critica. E ta bay conscientisa nos pueblo contra abuso di menor. Esaki mientras cu den otro asuntonan e ta contesta cu e no ta mete den cartera di otro minister. Aki por mira claramente cu e señora aki a inicia su campana politico. En bes di nombra terapista pa sector social y mas trahado social pa atende cu e tantisimo casonan cu dia pa dia ta crece, e ta pensa riba show. Tampoco e no a baha e lista di espera y mehora registracion pa duna bista transparente di cantidad di casonan.
A bira tempo pa bin cambio y mehoracion. Hunto cu mas cooperacion y registracion ta necesario un ley di jeugdhulpverlening pa asina regla den ley con ta proteha nos muchanan pa medio di diferente ministerio, instancia y profesionalnan y cu e ley aki lo mester stipula en general kico ta regarda e diferente procesonan, di accesibilidad, structura, registracion y cooperacion entre instancianan pa garantisa derecho di mucha y di esun abusa berdaderamente.
Na Hulanda y otro paisnan p.e. e ministerio di Asunto Social ta mara na esun di Salubridad y kinderbescherming (Volksgezondheid en Welzijn) pa di e forma aki garantisa cooperacion entre diferente di e ministerionan den defensa di e mucha.
Wyatt-Ras ta spera cu berdaderamente e gobierno aki stop di make up y cuminsa trata di berdad pa atende cu asuntonan di nos muchanan y di abuso di menor.
