Pa informador of formador e posibilidad tey pa MEP. Awor aki, segun Evelyn Wever-Croes, gobernador ta haciendo su sondeonan. Ora e papia cu tur hende, e ora e lo bay nombra un formador na final di e proceso.
Comunicacion cu partido
Prome cos cu Wever-Croes, e tabata tin un partijraad diasabra merdia. Despues di partijraad a haya autorisacion, e mandato di partijraad pa bay papia, pa bay felicita e partidonan cu a gana. A cuminsa cu yama sr. Ursell Arends. Nan a haci algo hopi bon. E hobennan aki, innovativo, a haci un cos grandi. Despues a yama sr. Otmar Oduber pa por felicit’e y despues a yama sr. Ricardo Croes tambe pa por felicit’e. Esey ta loke cu a wordo haci. Tambe a palabra cu lo warda e reunion cu Gobernador pa instruccionnan con pa sigui, pa no haci nada prematuro, nada pura pura, nada con cu ta. Tur cos mester bay netjes.
Parada
Wever-Croes no sa si hendenan di POR por a join e parada. Pero si el a mira hendenan cu bandera di POR canto di caminda, saludando e caravana pasa. Tambe tabata tin hende cu bandera di AVP ta saluda. Riba su mes, e parada cu a haci, tabata un parada mas bien pa gradici esnan cu a sostene e partido. Ta yama esaki un Parada di Cambio. Cu ta sinti e cambio. Y e tabata hopi grandi. Hendenan ta hopi anima y kier mira un tipo di coalicion ainda. Pero not a haci nada prematuro. Tur cos mester bay cu su trankilidad, pasobra esaki ta un proceso sumamente grandi. No por afford pa core yega na algo y na caminda ta topa cu un punto cu no a papia delanta, e ora tin un gobierno cu ta basha bin abao.
E choice
MEP tin un choice, y bay oposicion. Nan no ta ansha pa yega gobierno. Si no yega na un acuerdo di gobernacion, nan ta bay oposicion. Nan ta den oposicion caba. Perde no por perde mas. E ta hopi importante pa aclarea, cu nan no tin ansha pa drenta Gobierno tampoco. E pais tin un reto hopi grandi padilanti y mester di un gobierno stabil pa por atende cu e reto di e pais aki. Un cos con cu ta pega na otro, e no ta bay wanta y no ta bay sirbi e pais.
Coalicion
Evelyn Wever-Croes a splica cu el a hiba e mensahe hopi durante campaña. A splica e riesgonan cu ta bin cu un coalicion, pero esey ta un gepaseerd station, pasobra pueblo a papia. Voz di pueblo ta voz di Dios y tin cu respeta e voz di pueblo. E veredicto aki di pueblo no ta uno facil. E no ta un veredicto imposibel tampoco. Tin cu scucha y sa pakico pueblo a pidi esaki. E confiansa di pueblo den politica a baha. Cu tabata tin un deseo di coalicion, no ta un cos nobo. Ta algo cu tabata sa di dje, pasobra encuestanan tambe a mustra esey. Awo ta na MEP pa haci uzo di e oportunidadnan cu esaki ta ofrece, dun’e contenido pa trece e confiansa bek. Por ta den futuro bo no tin un gobierno di coalicion mas. Te ainda no por bisa cu un Gobierno di coalicion, pa Aruba tin hopi aña sin traha cun’e. Di antemano no ta bisa cu e no ta bon. Pero si tin mester, ta carga e responsabilidad pa esaki.
Proximo paso
Pa MEP, no tin mucho di haci. Ta warda riba sr. Gobernador, cu e caba cu su ronde di consulta cu e tin den e dianan aki. Su programa ta termina diaranson, e ora despues e lo laga sa kico ta e siguiente paso. De facto, MEP no tin mucho di haci. Loke si ta bay haci, cual ta bezig ta wordo haci, ta reuni cu varios di e conseheronan, hendenan di partido, pasobra con cu bay bin, esaki ta un procedura riba un nivel cu bo mester e conocemento, e experiencia cu mester haci uzo di mas hopi consehero cu ta posibel. Wever-Croes ta bay sigui den e ronda di reuni cu nan. Ta papiando di ex minister, ex politiconan, mas hende cu sa di e materia, pa nan conseha bon, pa por ta prepara riba cualkier eventualidad. Na momento cu Gobernador yama of duna un señal diahuebs, cu ya tin un Gobierno forma door di otro partido, ta saca e conclusion y bay den oposicion. Si e yama y ta haci apelacion riba MEP pa bay riba un proceso di informa despues forma, e ora MEP tambe ta cla pa esey.
