E mocion di desconfiansa emiti ayera door di e fraccionnan di AVP, MAS y Accion21 pa termina confiansa den minister-president y e mocion cu Raiz mes tin den tapara pa presenta awe, lo ta e motibo pa un “coalitieberaad” urgente actualmente den bestuurskantoor. MEP kier ta sigur cu Raiz ta riba mesun liña di pensamento cu nan y cu gobierno no ta cay durante pleno reunion publico awe mainta. Cu e opcion ey awo riba mesa, shete minuut prome cu e reunion di 9:00 am, a manda pospone te cu 11:00 am.
Ayera na final di e reunion, ora cu presidente a pospone pa awe mainta, Raymond Kamperveen a declara na 24ora.com cu e no ta satisfecho ainda. E parlamentario ta insisti di kier haya copia di e contract entre WEB y Eagle LNG y vooral e kier mira ki dia a firma e contract aki, pa den cierto sentido confirma cu MEP a tuma Raiz haci pasobra desde dia 5 di november Raiz a pidi pa duna cuenta sin cu nunca nan a bal un contesta. Tambe el a abstene di contesta riba e posicion di Raiz den e mocion di desconfiansa contra Evelyn Wever-Croes.
Separa di e realidad politico, den cual obviamente tin desconfiansa awo den e coalicion MEP-Raiz, mas bien tambe mester pensa riba un strategia di salida pa “scapa cara” dilanti nan votadonan y publico general. Pasobra, den e debate publico aki, un hende mester perde cara y de facto, ningun di dos kier acepta e sla politico.
Den seno di MEP tabata y ainda ta teme cu nan lider lo ta dispuesto pa sacrifica Minister Glenbert Croes pa salvaguardia e coalicion y sigui cu gobernacion. Pero ayera den e reunion e opcion ey a parce di tabata bari fo’i mesa. Wever a opta pa no contesta e preguntanan sino den bay den atake pisa contra oposicion, bahando e nivel di parlamento te na suela.
Ora a pensa cu esey lo a elimina e desconfiansa y cu Raiz lo ta “OK” bek, ta resulta cu Raymond Kamperveen y Misha Raymond di Raiz ta sigui riba nan mesun posicion y cu si no sali for di e impasse, cu no por descarta caida di e di dos gabinete cu ta carga fam di Evelyn Wever. Ya caba Kamperveen a adverti e lider di MEP cu el a divorcia RED y POR y cu e no por kere di lo sigui trata Raiz mesun cos. “Nos no ta nan”, ta palabranan fuerte cu a cay siman pasa, ora cu a sali publico riba e impasse aki, den cual MEP a permiti WEB firma un contract multimiyonario cu e compania Eagle LNG, den cual varios famia di e minister-president y Minister di Energia ta directamente envolvi.
Ta cuestiona integridad den “good corporate governance” bou cual WEB mester atene su mes na dje. Ta cuestiona hasta cu sua di e actual Minister di Energia (legalmente) ainda ta presidente di hunta di comisario di WEB y alabes director temporal di e compania, den cual e mes ta dicidi y controla su mes y cu liña directo na e politico. Mas metemento politico no lo por ta existi den un compania estatal.
Si tur cos keda cla na tempo, pa 11:00 am lo reanuda e reunion publico den Parlamento di Aruba, cu speransa cu e dos partidonan politico lo por sali di e impasse cu menos daño posibel na nan imagen y perdida directo di confiansa di nan votadonan.
