“Presidente di Partido MEP, Ricky Hoek, riba pregunta di prensa si MEP cu AVP por traha cu otro un dia den futuro, a bisa un gran berdad: dia AVP condena y rechasa corupcion manera MEP ta haci, MEP por considera di traha cu AVP. Pero tanten cu AVP ta sconde corupcion, ta brasa corupcion y ta sostene corupcion, AVP ta un academia di corupcion, MEP no lo ni considera traha cu AVP”, asina e partido a duna di conoce awe den un relato di prensa. Obviamente ta haci esaki pa “damage control” despues di locual Ricky Hoek a contesta e siman aki, den cual el a bisa cu MEP lo traha cu AVP un dia.
“Tin un diferencia grandisimo entre MEP y AVP y esey ta integridad. MEP ta tene standardnan halto di integridad. Cosnan cu antes tabata parse normal, awor no ta aceptabel. Esey ta pone cu talves mas politico ta cay. Pero integridad bo tin e of bo no tin e. P’esey MEP a traha riba leynan di financiamento di partidonan politico”, segun e partido a skirbi. Nan no a haci mencion cu den nan prome gabinete, gobierno a cay pa motibo di falta di integridad y investigacion riba un minister den nan gabinete y un parlamentario den nan coalicion. Den e gabinete aki awo, Gabinete Wever-Croes II, ata ta investigando cuater ex-minister di MEP, esta ex-MinisterChris Romero, ex-Minister Plenipotenciario Guillfred Besaril, ex-vice Minister Plenipotenciario Eddie Paris y e mas recien coordinador (alabes ex-minister den pasado), ing. Eddie Briesen.
MEP duna algun ehempel di otro partido, manera Mike Eman a haya por lo menos un donacion politico di Roberto Rincon, criminal Mericano,
di 50 mil dollar. MEP a cambia e ley y haci cu esey no ta posibel mas. MEP a traha e ley di screening di ministernan y awor danki na e ley aki hopi politico di AVP, cu por ehempel no por drenta Merca, no por bira minister tampoco. MEP a bin cu Bureau Integriteit Aruba y p’esey awendia cosnan no ta keda scondi mas manera antes.
MEP a bisa di ta demostra cu echo cu integridad ta sumamente importante. Integridad ta importante pa pueblo por haya confiansa bek den su politiconan. “Esey ta e meta di partido MEP”, di acuerdo cu nan relato di prensa.
