Den e ultimo dianan, varios parlamentario di e diferente fraccion di Staten a duna nan comentario riba caso Kwihi, esta e caso caminda cu e ex-ministernan Edison Briesen y Chris Romero ta envolvi. Un di e parlamentarionan tabata mr. Gerlien Croes.
Presidente di Parlamento, mr. Edgard Vrolijk a duna su comentario al respecto, kende a indica cu e no lo reacciona mes rib’e comentarionan di Croes, p’e por haya poco atencion politico.
E ta sigui: “E ley a cana su caminda y recientemente e ‘Nota naar aanleiding van het verslag’ a drenta y mi a tuma nota cu MAS y RAIZ so a haci pregunta riba e ley. E ley ta ‘OV ready’ pero no por yam’e pasobra nos ta bezig cu e rondanan pa prepara pa IPKO manera t’awe mes cu minister Xiomara y ayera cu Minister Ursell. Otro siman ta cortico y tambe ta rond af algun ultimo preparacion pa IPKO entre otro petite commite cu Corsou y Sint Maarten.
Despues cu ta bek di IPKO y Parlatino cu parlamentario Croes mes, cu ta pidi reunion lo asisti, lo mi yama e reunion aki,” Vrolijk a indica.
PROBLEMA CU HUSTICIA
Fuera di e comentario haci, Vrolijk a indica tambe cu hopi por trata na punta dede, pero pueblo por ta orguyoso cu e sa cu tin e mecanismonan na nan luga cu ta exigi p’e gobernantenan tene cuenta cu nan si nan no kier haya nan mes den problema cu husticia. Esaki t’e muestra cu e bara di integridad ta uno halto y sigur e ta garantisa pueblo cu den futuro pueblo por ta mas trankilo cu e casonan di corupcion y mal uzo di nan funcion por ta pa pasado.
Ley di financiamento di partido politico y ley di integridad p’e Ministernan
Si ehecuta e leynan aki mas aña atras, hopi mas politico lo por a haya nan mes den problema cu husticia pa entre otro ricibi fondo pa campaña for di exterior. Danki n’e implementacion di e ley aki esaki no ta permiti mas awe. Awo tur politico mester duna cuenta di ken y cuanto nan ta haya di donacion y sigur tur politico cu e fundacionnan mester atene n’e reglanan aki.
Implementando e ley di financiamento di partido politico ta stimula un fair playing field na unda Aruba completo sa ken ta esunnan of e companianan cu ta sponsor candidato of partido. Asina pueblo mes por wak y controla si esunnan cu ta sponsor ta haya tur cos di e Gobierno. Esaki sigur ta duna un balans n’e destahonan publico na Aruba.
E ley di integridad cu ta keda exigi p’e ministernan prome nan sinta, ora nan ta den funcion y hasta ora nan no ta den funcion, pa declara nan fuentenan di entrada ta percura pa evita iregularidad. Asina por controla di unda ministernan ta haya nan bienesnan y esaki sigur ta duna pueblo e trankilidad cu un minister ta biba di su propio entrada cu ley ta prescribi. Pues esakinan ta barera halto cu e gobernantenan y e futuro gobernantenan mester tene cuenta cu ne si nan no kier haya nan mes den problema cu husticia.
Ombudsman
Na momento cu e Ombudsman ta den funcion, e bara di integridad lo ta bay mas halto ainda. Aki pueblo lo tin acceso pa entrega keho cu kisas ainda tin miedo di haci pa motibo cu no tin garantia pa nan anonimato y unda cu esaki cu e Ombudsman ta garantisa. E gobernantenan sigur tin di tene mas cuenta ainda cu nan ta cana riba un glas fini y si nan faya nan por haya nan den problema.
Mester sigui traha preventivo
Asina mes cu e bara di integridad porfin t’asina halto den historia di Aruba, esaki no ta garantisa cu no lo pasa mas caso di corupcion of mal uzo di funcion, pasobra pa comete un fechoria ta exigi dos actor. Aki ta unda ami como Presidente di Parlamento, cu t’e trekker di integridad, pa pais Aruba ta pidi gobierno pa acelera e proceso di conscientisacion den tur e departamentonan di gobierno. Tambe pa acelera e proceso di digitalisacion cu e ciudadano mes ta wak unda su peticion ta y sa cerca cua ambtenaar e mester acudi p’asina kita e necesidad, manera t’e caso awo, di acerca e politiconan pa yuda den e procesonan cu ta pega y no ta haya contestacion.
Pa termina como Presidente di Parlamento awe mi por bisa cu porfin pueblo ta wak e frutonan di cambio di ley y tur gobernante cu pueblo a duna nan e confiansa di por goberna e pais aki y a mal uza e funcion, tin di para responsabel pa nan mal actonan y sigur tur partido of politico cu ta sostene e mal actonan contra pueblo y ta hasta hustifica cu poder ta corumpi tur hende, mester cuminsa evalua nan mes y nan partido, pasobra esey ta muestra caba di un pensamento eroneo y sigur ta haci nan y nan partido vulnerabel di awo caba p’e actonan di corupcion y mal uzo di funcion,” ta loke cu e Presidente di Parlamento a bisa por ultimo.
