Aña 2019 ta tras di lomba. Loke a hala atencion ta cu a cera aña cu atraco y a habri aña cu otro atraco grandi, riba un joyeria den Ritz Carlton.
Den combersacion cu vocero di Cuerpo Policial Lito Lacle, a haya un bista mas cla di loke tabata e situacion di atraconan cometi na Aruba durante 2019.
E cifranan oficial ta mustra cu un total di 47 atraco a keda cometi den 2019, y relaciona cu esaki a detene 84 persona. Loke cu a hala atencion ta cu di e total personanan deteni relaciona cu atraco, 57 ta Arubiano. Di e restonan 20 ta Venezolano, 6 ta Dominicano y un ta Colombiano. “E parti peculiar ta cu te cu september tabatin solamente 5 Venezolano deteni. Pues den e ultimo dos luna y mey di aña 2019 a detene 15 Venezolano cu tabata envolvi den atraconan.”
Loke cu pa KPA tambe ta remarcabel ta cu mayoria di e atraconan no ta wordo planea door di stranhero.
Ta e Arubiano ta traha riba e plan, e transporte y busca informacion. Mayoria esnan cu ta ehecut’e ta e stranheronan. . “Pero esnan cu ta planea e atraconan ta Arubiano. Den cada atraco tin Arubiano envolvi, sea den e planeamento of den e ehecucion. E cifranan ta mustra cu dos tercera parti di esnan envolvi ta Arubiano.”
Cifranan di e aña’ki ta hopi mas concreto cu añanan anterior y cu lo yuda Cuerpo Policial fiha su maneho.
Hopi biaha, Lacle a bisa, casonan manera atraco por tuma luga debi na falta di precaucion di e mesun victimanan. Por ehempel hiba placa door di un persona ta innecesario. Pakico risca bida, si tin servicio di transporte di placa, cu ta encera cu e placa ta sigura tambe si algo sosode.
Loke tabata remarcabel ta cu den luna di december, segun cifranan registra, tabatin 4 atraco registra tras di otro den 24 ora di tempo, entre otro esun na un cas na Tanki Leendert unda cu a bay cu basta placa.
Arma
Arma di candela tambe ta un problema aki na Aruba. Ministerio Publico ta mantene un maneho cu posesion di arma di candela pa prome biaha, ta exigi un castigo sigur di 18 luna. Den 2019 nan a trece diferente di e casonan aki dilanti mesa berde.
Di e cifranan aki vocero di Polis Lito Lacle a bisa cu te cu november, 2019, a confisca 19 arma di candela, cu toch ta menos cu otro añanan. Mayoria di e armanan tabata pistol y dos aña tras di otro a yega di confisca handgranaat cu tambe ta cay bou di arma.
Den 2019 tabatin solamente tres asesinato, tur a keda soluciona.
