E siman aki Fundacion Parke Nacional Aruba (FPNA) a cuminsa cu ultimo fase di e plan reorganisatorio cu ta forma parti di e mitigacion di e impacto financiero relaciona cu e crisis economico financiero cu e pandemia di COVID-19 a trece cu ne pa Aruba. Di un manera diligente gerencia di FPNA, cu aprobacion di e Hunta di Supervision, a tuma e pasonan necesario durante aña 2020 pa mitiga e efecto financiero.
A haci esaki pa garantisa continuidad di e trabou di conservacion di naturalesa di Aruba. E impacto di COVID-19 a afecta fuentenan di entrada di e fundacion, specialmente ora Gobierno di Aruba a reduci nan subsidio cu 12.6%. Tambe e entrada di bishitante ricibi na Parke Nacional Arikok a cay cu un averahe di 70% compara cu 2019.
Hunto cu e ehercicio pa reduci e gastonan operacional mas tanto posibel, FPNA ta sigui tuma pasonan necesario na bienestar di e fundacion y tur empleado. Desde juli 2020 e empleadonan di FPNA a entrega 8.5% di salario. Durante e prome lunanan di 2021 tabatin varios reunion cu trahado di FPNA y cu sindicato SEPPA y Landsbemiddelaar y asina a yega na un acuerdo mutuo pa ahusta salario di empleado cu un reduccion total di 15%.
FPNA tambe a inicia un proceso di ofrece pakete boluntario di cual 11 trahado a haci uzo di esaki. Tambe a ofrece algun trahado un cambio di funcion y algun a tum’e. Pa algun otro trahado FPNA lo mester pidi ontbinding pa por finalisa e ‘afvloeiingsplan’. Cu e mitigacionnan aki FPNA lo por evita un situacion financiero precario. Awo cu menos trahado, Parke Arikok lo sigui tuma pasonan necesario pa yega na un finansa sostenibel. Mas dilanti FPNA lo enfoca riba desaroya y modernisa procesonan di trabou: con por traha mas eficiente y na mesun tempo mehora calidad di servicio.
Cu cifranan di Aruba Tourism Authority, tur luna parke ta monitor y midi e cantidad di bishitante cu ta bishita Aruba den comparacion cu Parke Nacional Arikok. Pa e ultimo añanan Parke Nacional Arikok tabata ricibi un averahe di 10% di turista cu ta bishita Aruba. Desde introduccion di e maneho di ATV/UTV y tambe e pandemia di COVID-19 e cifra aki a baha cu un averahe di 1.5%, cu ta haci cu actualmente 8.5% di turista cu bishita Aruba ta bishita Parke Nacional Arikok.
E team di maneho ta den proceso di formula un plan comercial nobo pa recupera e perdida di e 1.5% mas alinea cu e pensamento di un recreacion sostenibel cu ta den balansa cu naturalesa. Fundacion Parke Nacional Aruba ta gradici comunidad di Aruba pa e sosten durante e proceso di recuperacion.
