Rotary Club Aruba anualmente ta haci donacionnan cuantioso na otro fundacionnan y organisacionnan di bon causa den comunidad. Aunke cu anualmente ta dedica un suma mas halto na dos organisacion specifico, cu ta hopi na curason di e club, esta na YMCA y Centro Kibrahacha. Aña pasa, despues cu a organisa e di 39 Fiesta Rotaria a logra recauda alrededor di 400 mil florin cual a reparti bek bou di 21 fundacion. E aña aki no tabatin Fiesta Rotaria, debi na Covid-19 y prohibicion pa organisa eventonan publico, pa cual a organisa e rifa so.
Apesar di e situacion cu nos isla ta pasando aden y mirando cu e feria di Fiesta Rotaria mes no a bay door e aña aki, toch e benta di rifa a bay hopi miho cu Rotary Club Aruba a spera, danki na e sosten masal di e comunidad di Aruba. E benta y sorteo di e rifa a contribui na un suma total di AWG 264.000,- cu a reparti bao di diferente fundacion den nos communidad.
Durante un anochi ameno Presidente di Rotary Club Aruba, America Barrios, a haci entrega di e fondonan na e fundacionnan, entre otro: Kibrahacha 60+, YMCA, Casa Cuna Progreso, Koninging Wilhelmina Kankerfonds, Aruba Demolay, Aruba Rainbow Girls, Ban Uni Man Pa Cria Nos Muchanan, Grupo Scout Sonrisa, Hende Muher den Dificultad, Edmund Harms Foundation, Arubaanse Padvindsters Gilde y Stichting Reclassering en Jeugdbescherming.
Na final a gradici tur e fundacionnan cu tin un tarea clave den nos comunidad. Presidente America Barrios a duna danki un biaha mas na tur esunnan cu a aporta y a cumpra rifa. Tambe un gradicimento na tur patrocinado pa nan contribucion. Un danki special na miembronan di Rotary Club Aruba, Rotaract Club Aruba, Interact Club Aruba Schakel College y Interact Club Colegio Arubano cu a yuda bende rifa pa asina por a recauda e bunita suma aki. “Nos ta conta cu Bo(so) contribucion atrobe otro aña”, asina Presidente America Barrios a comenta.
